अखबार

यु कबि भुक्कु नि रंदु।
बर्त नि रखदु
रोज-रात खुन्न सि पैलि करिदेंदु-
प्वटगि-डमडमि काच्चु पाक्कु/ भलु-बुरू-जनु भि मिलु।
यु लुकाईं-छिपाईं बात्तु तैं ऐथर ल्हौंदु!
चोर-जारू तैं सजा दिलौंदु!
गरीब-गुर्बौं कि मदत कर्दु/-
विकासै तस्बीर खैंचदु/ गड्यां मुर्दा उखाड़दु!
रोज-रातै खट्टि/मिट्ठि/ कड़ि/मर्चुसि तैलि…
बात्तु लीक औंदु
अर जगा-जगौं जैतैं- लुकारि भूक तीस मिटौंदु-
अपणा कै नौं अर रूप सि।
तबी त क्वी ए सुबेर द्यखदन,
दिन मां पढ़दन-
अर रात तक चाटण्यां रंदन-अरकै-फरकैक-
भैर-भित्र।

डॉ. सुरेन्द्र दत्त सेमल्टी