एनडीए सरकार ‘मजबूत’ न बल ‘मजबूर’ होलि

तिसर दा एनडीए क सरकार बणि जाली पर अयोध्या म हार भाजपा तैं सदनि याद राली। जनवरी म जब प्रधानमंत्री न अयोध्या राम मंदिर कु उद्घाटन कायी त, ब्वलें जाणु छायीं कि यांकु फैदा भाजपा तैं मिललु अर भाजपा कु ब्वनी छायीं कि ‘जो राम को लाये है, हम उनको लाये है।

पर आज यीं भगवान रामक अयोध्या मा सपा क उमेदवार अवधेश प्रसादन लगातार द्वी बार 2014 अर 2019 म जित्यां भाजपा प्रत्याशी लल्लू सिंह तैं हरै दे। आज जु भगवान रामन तैं लेकैकि अयां, वैकु (मोदी) कु सर्या खेल, भगवान रामन हि खराब कै दे।

उत्तर प्रदेसन आज वु कै दे, जैकि भाजपा क्य कैथैं बि दूर-दूर तक उमेद नीं छायीं। प्रधानमंत्री मोदी न उत्तरप्रदेस मा खूब प्रचार कायी अर राम मंदिर, मोदी क गारंटी, खुब हिन्दु-मुसलमान कायी।

ब्याली तक एग्जिट पोल मा ब्वलें जाणु छायीं की उत्तरप्रदेसा लड़ै म भाजपा समणि क्वीं नी च अर लड़ै एक तरफां च।

एग्जिट पोल म भाजपा तैं उत्तरप्रदेश बिटि 70 सीट दिये जाणि छायीं। पर जन्नि आज सुबेर मतगणना ह्वे त प्रधानमंत्री कु 400 पार नारा क ह्व्वा निकलि ग्ये। कखि इन्न नीं दिखे कि भाजपा जादा से जादा सीट जितणि च।

आज अमेठी स्मृति ईरानी तैं कांग्रेसा छ्वटा कार्यकर्ता न हरै दे। अर मोदी तैं इतगा बड़ी जीत नीं मिलि। मोदी तैं पिछल दा क तरौं बड़ी जीत नीं मिलि, मोदी तैं सिरफ 1 लाख 52 हजार बोटु से हि जीत मिलि।

अबि तकाक आंकड़ा बतौंणा छन कि एनडीए तैं 291 अर इंडिया गठबंधन तैं 236 सीटु पर जीत मिलणि च।

मोदी की राजनैतिक जिन्दगि म इन्न यु पैलि बार होलु वुंकी सरकार पूर्ण बहुमत (भाजपा) सरकार नीं होलि। अब देसम मोदी न बल एनडीए क सरकार होलि, मोदी कु कुर्सी जेडीयू अर टीडीपी क ठंगरु पर खड़ी राली।

अर अब या बात मोदी न बि मानि याली, ब्याली तक मोदी जी ‘मोदी सरकार’, मोदी गारन्टी, मोदी कु भरोसु ब्बना छायीं त आज मोदी जी पैलि बार एनडीए सरकार बोलि, मोदी न पैलि बार बोलि कि तिसर बार देसन एनडीए पर भरोसु कायी।

साफ च अब एक अकेला सब पर भारी नीं रै ग्यायी। अब 10 साल बाद ‘मोदी सरकान’ न बल ‘एनडीए सरकार’ होलि अर या सरकार मजबूत न बल मजबूर सरकार होलि।