मुख्यमंत्री धामीन राष्ट्रीय सुरक्षा सलाहकार अजीत डोभाल से कायी भेंट

देरादूण। प्रदेसा मुख्यमंत्री पुष्कर सिंह धामीन आज छंचर खूंणि राष्ट्रीय सुरक्षा सलाहकार अजीत डोभाल से भेंट कायी। अपड़ा दिल्ली दौरा क दुसर दिन मुख्यमंत्री न अजीत डोभाल क घार जैकि उंका दगड़ मा भेंट कायी। समसामयिक विषयों पर द्वियों न छ्वीं लगैं।

या स पैळि धामीन प्रदेस क दिकदरि क बारा मा केन्द्रीय मंत्रि आर. के. सिंह अर महेन्द्र नाथा दगड़ मा भेंट कै छायीं। जैमा धामी न केन्द्रीय ऊर्जा मंत्री से उत्तराखण्ड थैं ऐ मैना 300 मेगावाट जादा बिजली दियें जाणा खूंणि धन्यवाद बोलि। धामी प्रदेस मा बिजली क कमि थैं पूरू करणा खूंणि केंद्रीय पूळ बटि मार्च 2024 तक 400 मेगावाट बिजली औरि दियें जाणा क विनति कायी।