उत्तराखण्ड मा नै राष्ट्रीय शिक्षा नीति-2020 ह्वै सुरु

देरादूण। मुख्यमंत्री पुष्कर सिंह धामीन आज मंगळवार खूंणि निदेशायल माध्यमिक शिक्षा ननूरखेड़ा मा बाल वाटिका कक्षाक सुरूआत कायी।

बाल वाटिका थैं सुरू करणा दगड़ा-दगड़ि उत्तराखण्ड मा राष्ट्रीय शिक्षा नीति-2020 सुरु ह्वैग्यें। राष्ट्रीय शिक्षा नीति-2020 थैं सुरु करण वलु उत्तराखण्ड सर्या देस मा पैळु राज्य बणिग्यें।

ऐ मौका फर मुख्यमंत्री न प्रारम्भिक शिक्षा निदेशायलक बिल्ड़िग कु लोकार्पण अर एस.सी.ई.आर.टी. क बिल्ड़िग कु शिलान्याभि कायी।

ऐ मौका फर मुख्यमंत्री न नौन्याळु मा उद्यमिताक विकास खूंणि कौशलम् पुस्तक अर कैरियर कार्ड कु भि विमोचन कायी।

मुख्यमंत्री धामीन न बोलि कि उत्तराखण्ड राष्ट्रीय शिक्षा नीति-2020 मा बाल वाटिका थैं सुरू करण वळु पैळु राज्य च। उन्न बोलि कि प्रधानमंत्री क नेतृत्व मा देस मा शिक्षा क तोक मा राष्ट्रीय शिक्षा नीति-2020 एक न्यूं क्रांन्तिकारी बदळाव च। उन्न बोलि कि या शिक्षा नीति नौन्याळु क भवैष्य थैं अच्छु बणौंणा कु काम कराली। उन्न बोलि कि नौन्याळु क भवैष्य थैं बणाणा मा गुरूजनु कु बौत बडु़ हत्थ हूंद। नौन्यळु थैं संस्कार अपड़ा ब्वे बुबों से मिलदु, यांक बाद ऊंकी जिन्दगि थैं बणौंणा मा गुरूजनु क बौत बड़ु हत्थ हूंद।

मुख्यमंत्री न बोलि कि राज्य मा राष्ट्रीय शिक्षा नीति-2020 थैं 2030 तक पूरू तरौं लागु करणा कु लक्ष्य रख्यूं च। मुख्यमंत्री न बोलि कि शिक्षा विभाग से उमैद च कि विभाग 2025 तक शिक्षा क तोक (क्षेत्र) मा इन्नों काम कर्यां जू सर्या देस मा एक उदाहरण हो। उन्न बोलि कि हमन सबि विभागु थैं लक्ष्य दींयूू च बल 2025 मा जब उत्तराखण्ड राज्य स्थापना दिवस क रजय जयंती मनौलु तब सब्यां विभाग कु खास काम भुंय्यां मा दिखेण चैंद। मुख्यमंत्री न बोलि कि उत्तराखण्ड थैं देस मा सबसे अनगै रैंण वळु राज्य बणाणा खूंणि सरकार विकल्प रहित संकल्प क दगड़ा अगनै बढ़णि च।

शिक्षा मंत्री डॉ. धन सिंह रावत ने बोलि कि आंगनबाड़ी केन्दु अर स्कुळों मा आज बटि बाल वाटिका थैं सुरू करैं ग्यायी। उन्न बोलि कि राष्ट्रीय शिक्षा नीति-2020 ळ भारतक कु ज्ञान अर परम्परावु थैं अगनै बढ़यें जाणु च। योग, वेद, पुराणु , अपड़ि बोलि अर संस्कृति क शिक्षा फर साख ध्यान दियें जाणु च।

ऐ मौका फर विधायक उमेश शर्मा काऊ, महानिदेशक शिक्षा वंशीधर तिवारी, अपर सचिव शिक्षा दीप्ति सिंह, निदेशक माध्यमिक शिक्षा डॉ. आर. के. कुंवर, निदेशक अकादमिक शोध अर प्रशिक्षण सीमा जौनसारी, निदेशक प्रारम्भिक शिक्षा वंदना गर्ब्याल, शिक्षा विभाग अर महिला सशक्तीकरण अर बाल विकास विभाग क अधिकारी मौजूद छायीं।