नरकोट क ध्वार भुंय्यां प्वोड़ि पुळ कु शटरिंग, द्वी भुरत्या वखम हि ह्वैग्यीं टुणपट

बदरीनाथ हाईवे मा नरकोटा क ध्वार (नजदीक) पुळ कु शटरिंग गिरण से बडु हादसा ह्वैग्यें। पुल मा काम करण वला 10 भुरत्या (मजदूर) माटु मा पतड़ें (दब) ग्यीं। जै मा 8 मजूर थैं ज्यूंद भैर निकळें ग्यायी। अर द्वी भुरत्या वखम हि टुणपट (मृत) ह्वैग्यीं। घलै द्वी मजूर क हालात बौत खराब च।

घटना सुबेर ह्वै जब पुळ मा काम चलणु छायीं। तबरि हि ळुवा (लोहा) कु शटरिंग भुंय्यां मा प्वोड़ि ग्यें। जैमा 10 भुरत्या शटरिंग के ताल पतडे़ं ग्यीं।

जन्नि या खबर एसडीआरएफ थैं मिलि उन्नि जिला प्रशासन अर एसडीआरएफ क टीम वखम पौंचि ग्यें अर पतड़यां 8 भुरत्यों थैं भैर निकळें ग्यें। जैका बाद ळुवा कटण वळि मसीन न ळुवा काटिक भुरत्यों थैं भैर निकळें ग्यें पर तबरि तक द्वी भुरत्या टुणपट ह्वैग्यीं।

जिलाधिकारी रूद्रप्रयाग न बतै कि ऑल वेदर रोड मा नरकोट क नजीक एक पुळाकु काम चलणु छायीं। उन्न बोलि कि ईं घटना मा पैळि त पुळ बणाण वळि कम्पनी के लापरवै समणि आणि च। उन्न बोलि कि कम्पनी न भुरत्यों क सुरक्षा के कुई इंतजाम नि कर्यां छायीं। ईं घटना के जांच के आदेश दे दीं।

मुख्यमंत्री धामीन ऐ हादसा मा दुख जतै अर घलै भुरत्यों क जलदि ठीक हूंण के अरज कायीं।