नकपोडु़ कु सवाल

विधानसभा मा हवै भर्ति घोटाळों क जांच खूंणि विधानसभा अध्यक्षा न तीन सदस्य जांच कमेटी क्या बण्यें बल विधानसभा मा काम करण वळा अर नेतौं क बरमण्डु मा पसीनौं क धारा अर जिकुड़ि मा झुराण हूंण लगिग्यें। विधानसभा मा रोज भर्ति घोटाळों क नै-नै लिस्ट वायरल हूंणि च। जै मा कै न कै नेतौं क रिश्तादार, कुटम्ब क मनखि क नौ छन। सतपाल महाराज अर निशंक द्वी जना छन, जौ न यू लिस्ट का बारा मा बोलि। अर साफ कायी कि लिस्ट मा जू नौ छप्या छन, ऊंका दगड़ मा हमरू क्वीं भि रिसता नी च। यांक अलावा कै भि नेतान अपड़ि सफै नि दे। अब इन्न मा साफ च विधानसभा मा ह्वीं भर्ति मा कुछ न कुछ त झोल च? अर नेतौं क नौ सुदि नि आणा छन।

कांग्रेस हूयां या भाजपा द्वीय दल एक दूसर थैं दोस देंणा छन कैलेकि द्वीयों क राज मा विधानसभा मा भर्ति ह्वीं छन। ईं बडु़ कारण च द्वीया दलों क साख दांव पर च। कै नेतौं क नौना थैं अर रिस्तदारू थैं पिछने क द्वार बटि विधानसभा मा नौकरि दियेंग्यें, अर कैळ अपड़ों थैं नौकरि मा भर्ति करणा खूंणि चिट्ठी लेखि या बात सब्यौं क समणि आण चैंद। दूसर तरफौं भ्रष्टाचार फर जीरो टॉलरेंस के दावा करण वळों खूंणि या भर्ति गौळा क फांस बणिग्यें। प्रदेस बेरोजगार सड़क्यिों मा आन्दोलन करणा छन, अर प्रदेस मा हूयां भर्ति घटाळों मा सीबीआई जांच क मांग करणा छन।

दूसर तरफ विधानसभा अध्यक्ष ऋतु खण्डूडी न विधानसभा मा ह्यां भर्ति घोटाळा क जांच खूंणि एक कमेटी बण्यें याली। जै कारण अब हमरा माननीय थैं डौर च लगणि कखि या जांच क आग ऊंका घार तक न पौंचि ज्यां, इल्लै माननीय परेशान छन। अर जू विधानसभा मा भर्ति हूयां ऊथैं अब अपड़ा भविष्य क चिंता च। विधानसभा मा पिछनै क द्वार बटि ह्वीं भर्ति क दाग सरकार मा वित्त मंत्री प्रेेमचन्द्र अग्रवाल पर भि छन।

अब इन मा बडु सवाल यौं च सरकार या फिर शासन प्रशासन क्या कारवै करदू? अब सवाल यौं भि च बल, क्या जांच कमेटी प्रेमचन्द्र अग्रवाल गौळा तक अपडु हत्थ लिजाळि, या फिर ऊ सै सवाल जबाव करणा की हिकमत कै साकाळी। इन्न मा विधान सभा मा ह्वी भर्ति घपलों क सै जांच अर घपलौं मा साामिल ऐबियों थैं सजा देंणु अब सरकार खूंणि अपड़ा नकपोडु़ बचाणा कु सवाल भि बणिग्यें।

अब दय्खण वलि बात या च बल विधानसभा भर्ति मा हूंया घपलोंक या आग कतगा ऐबियों (दोषियों) थैं भुबरान्द ।