नगर निगम देरादूण: नै बोर्ड समणि बौत छन दिकदारि

जन्नि जन्नि मतदाना तरीख नजीक औंणि च उन्नि उम्मेदवारु चुनौ प्रचार की गाड़ि बि खळाखळ अगनै बढ़दै जाणि च। खुब चचगारा, कुरै अर यांका बाद बरखा अर ह्यूँ प्वड़णा बाद बि सियासी तापमान खळाखळ मत्थी चढ़दै जाणु च।

राष्ट्रीय पार्टी का उम्मेदवार हूंया य निर्दलीय उम्मेदवार मतदातौं क खुट्टौ मा प्वड़णा छन अर ब्वना छन कि मि छौं तुमरू भलु करणु वलु।

प्रदेसम निकाय चुनौम मुकाबला त कांग्रेस अर भाजपक बीच हि च। अर द्विया दलु वास्ता निकाय चुनौ जितणु बौत जरूरी च। भाजपा देरादूण नगर निगम मा दूबरा औंणा की त कांग्रेसा समणि साख बचौंणा चुनौती च।

प्रदेसम 23 जनवरी खुणि मतदात होलु अर 25 जनवरी खुणि देरादूण तैं लगभग एक साल बाद नै मेयर अर 100 वार्डम पार्षद मिली जाला।

नै मेयरा अर नगर निमगा बोर्ड क समणि चुनौती कम नीं छन। देरादूणम अज्काल ज्वा सबसे बड़ी दिक्कत च, वा च सड़कियौं की, पिछल द्वी साल बिटि सीवर लैना नौं पर जगा-जगा ख्वदि छन। सफै कु बन्दुबस्त, स्ट्रीट लैट, फुटपाथ पर कब्जा हटौंणु एक बड़ी चुनौती च।

सरकरि जमीन पर कब्जा देरादूणा की किसमत बणिग्ये। जै से देरादूण अंद्वार त खराब ही ह्वे यां से ट्रैफिक अर जल निकासी क दिक्कत जादा ह्वै।

सैरम जगा-जगा नालियौं मा कब्जा छन। बस्गाल मा जरा बि बरखा क्य ह्वे, की सर्या देरादूणम पाणिन भ्वरे जान्द। ज्वां देरादूणा बौत बड़ी दिक्कत ह्वेग्ये। यांका अलाव सैर म सार्वजनिक शौचालयों की बौत कमी च, बच्चों क ख्यलण वास्ता पार्क, खेला मैदान नीं छन। फल-सब्जी ब्यचण वलौं का वास्ता जगा (वैडिंग जोन) अर पार्किंग, पालीथिन पर रोक लगौंणा, सीवर लैन जना जरूरी काम पैलि छन।

त अबि कुछ दिन पैलि राष्ट्रीय हरित प्राधिकरण क आदेशा कारण मलिन बस्तियौं म रैण वलौं पर खतरा पैदा ह्वेग्य। यु मलिन बस्तियौं मा बिजली, पाणि, सीवर लैन सबि कुछ छन पर अबि तक यु बस्तियौं तैं स्थायी करणा कु समाधान तक नीं ह्वे। नै बोर्ड समिणि मलिन बस्तियौं कु नियमतिकरण करणु अर देरादूण तैं ‘स्वच्छ दून, हरित दून’ बणौंणु बड़ी चुनौती च।

देरादूण मा मेयर कैबि पार्टी कु बण्यां पर या बात साफ च की नै बोर्ड से लोगु तैं बौत उम्मेद छन, अर नै बोर्डा वास्ता, लोगुकि उमेदु तैं पूर करण क्वीं असान काम नीं च।