मत मारो प्रेम लाला पिचकार, नरेन्द्र सिंह नेगीन कायी प्रेमचन्द अग्रवाल पर शब्दु की मार
मत मारो प्रेम लाला पिचकारी
तेरी पिचकारी मा भरी छन गाळी।
नेगीजी होरी कार्यक्रम मा यु गीत क्य लगै कि ये गीता छ्वीं चौर्तफा हूंण लगिग्ये। अर होरी क छरोळि म सियासी घमाचूर बि मचिग्ये।
गढ़वळि लोक गितार नेगी न ‘मत मारो प्रेम लाला पिचकारी’। तेरी पिचकारी मा भरी छन गाळी‘ लगै । नेगी जी ऐ गीतन प्रदेसम सियासी घमाचूर मचिग्ये। नेगी जी ये गीता जरिया कैबिनेट मंत्री प्रेमचन्द अग्रवाल पर सीधा निसाणा लगै।
बतै दियां की यां से पैलि बि नरेन्द्र सिंह नेगीन नारायण दत्त तिवारी मुख्यमंत्री छायीं तबरि ‘नौछमी नारैणा’ गीत लगैकि, त जब रमेश पोखरियाल मुख्यमंत्री छायीं उबरि ‘अब कतगा खैल्यो रिश्वत कु रैलो रे’, गीत लगै कि निशंक अर भाजपा कु बंटाधार कै दे छायीं।
होरी मा जख सर्या देस अर प्रदेसा लोख होरी क मतंग मा रंग्या छायीं। इन्न मा नरेन्द्र सिंह नेगीन एक इन्नु गीत लगै जैकि खुब छ्वीं हूंणि छन। नेगी जी न विधानसभम उत्तराखण्डियों तैं गाळी देंण वळा कैबिनेट मंत्री प्रेमचन्द अग्रवाला पर शब्दु का बाण चलैकि प्रेमचन्द अग्रवाल हि ना बल भाजपा बि झंजोड द्यायी।