नगर निगम देरादूणा, डेढ़ सौ साला जातरा

प्रदेसा सबसे पैलु नगर निगम देरादूण, सबि निकायु मा सबसे बडु नगर निगम च। जख सबसे जादा मतदाता अर वार्ड छन।
25 नवम्बर 1998 मा राज्यपाला मंजूरि बाद नगर पालिका परिषद तैं नगर निगम बणौंणा अधिसूचना जारी करे ग्यायी अर या अधिसूचना 10 दिसम्बर खुणि लागू ह्वे। तबरि नगर पालिका देरादूण मा 36 वार्ड सामिल छायीं। नगर निगम बणाण बाद निगम तैं बढ़ये ग्यायी अर 22 हौरि गौं तैं नगर निगम मा मिलैकि 60 वार्डु कु करे ग्यायी। उत्तराखण्ड बणणा बाद पैलि नगर निगम देरादूण मा 60 वार्डु मा चुनौ ह्वे अर कांग्रेसा मनोरमा शर्मा देरादूणा पैलि मेयर बणि। यांका बाद साल 2008 अर 2013म विनोद चमोली खळाखळ द्वी दा मेयरा कुर्सी पर रैन। यांका बाद साल 2018 सुनील उनियाल गामा मेयर बणिन।

सात साल पैलि नगर निगमा सीमा विस्तार करे ग्यायी अर 72 गौं तैं न गर निगम मा सामिल करे ग्यायी। जैका बाद नगर निगम देरादूण मा वार्डु संख्या 100 ह्वेग्ये। अबि नगर निगम देरादूण सात विधान सभा क्षेत्रु तक फैल्यूं च।

देरादूण नगर निगम प्रदेस सबसे बडु नगर निगम अर सबसे पूरणु नगर निगम च। ब्रिटिश शासन म्यूनिस्पैलिटी (सिटी बोर्ड) बिटि नगर पालिका परिषद अर नगर निगम देरादूण बणणा की डेढ़ सौ साल की जातरा तीन वर्ग किलोमीटर बिटि आज 183 वर्ग किलोमीटर तक फैलिग्ये। जख सबसे जादा वार्ड अर सबसे जादा बोटर छन।

ब्रिटिश शासन मा म्युनिसिपल एक्ट पारित हूंणा बाद नवंबर 1991 मा पं अनंत नारायण तन्खा पैलि नगर पालिका अध्यक्ष (चेयमैन) बणि। यांका बाद राय बहादुर, उग्गरसेन, खुरदेश लाल, हाजी हश्तयाले, अहमद, वांका बाद देस आजाद हूंणा बाद आनंद स्वरूप गर्ग पैलि चेयरमैन बणिन। मास्टर केशव चंद्र, महंत इंद्रेश चरण दास, मास्टर रामस्वरूप, कुंवर बृजभूषण, सुशील चंद्र जैन, भोलादत्त सकलानी, दीनानाथ सलूजा अर साल 19998 मा नगर निगम बणाणा बाद विनोद चमोली नगरपालिका चेयरमैन जगा पर मेयर बणिग्येन।

साल 2003 मा पैलि नगर निगमा चुनौ मा मनोरमा शर्मा देरादूणा पैलि मेयर बणि। यांका बाद साल 2008 अर 2013 मा खळाखळ द्वी दा विनोद चमोली मेयरा कुर्सी पर रैन। यांका बाद साल 2018 सुनील उनियाल गामा मेयर बणिन। ऐसु 2025सा चुनौ मा कु देरादूणा मेयर बणदु यु 25 जनवरी 2025 तक भवैष्या पुटगम च?