मुख्यमंत्रीन हंस फाउण्डेशन क पुळिस थैं दीं गाड़ियों थैं दीखें झण्डा
देरादूण। मुख्यमंत्री पुष्कर सिंह धामी न आज मुख्यमंत्री कैम्प कार्याळय मा हंस फाउण्डेशन क पुळिस विभाग थैं दीं गाड़ियों थैं हारू झण्डा दीखें।
हंस फाउण्डेशनळ ईं गाड़ी उत्तराखण्ड पुळिस थैं हिळ पैट्रोळिंग अर इमरजेंसी रिस्पॉन्स खूंणि दीं। हंस फाउण्डेशन क तरफ बटि पुळिस विभाग थैं 101 गाड़ी दियें जणि।
ऐ मौका पर मुख्यमंत्री धामी न उत्तराखण्ड पुळिस थैं हंस फाउण्डेशन क दीं मदद खूंणि फाउण्डेशन क संस्थापक भोळे जी महाराज अर माता मंगळा जी कु आभार कायी। मुख्यमंत्री न ब्वाळ कि आज तकनीक कु जमनु च, जैमा पुळिस भि स्मार्ट हूंणि चैंद। उन्न ब्वाळ कि कोरोना काळ मा उत्तराखण्ड पुळिस ळ बौत अच्छु काम कायी। धामी न ब्वाळ कि उत्तराखण्ड पुळिस प्रदेस क रैवासियों क मदद करणा खूंणि हमेसा तयार रैंद।
मुख्यमंत्री न ब्वाळ कि हंस फाउण्डेशनळ पुळिस व्यवस्था क सुधार मा सहयोग कायी, ऊंकु यू सहयोग जन सेवा मा बौत मदद कराळु। उन्न ब्वाळ हंस फाण्डेशन प्रदेस क हर क्षेत्र मा हमथैं मदद करणु च। स्वास्थ्य, शिक्षा अर औरि भि बौत सर्या जगा मा हंस फाउण्डेशन प्रदेस थैं मदद करणु च।
माता मंगळा जी ब्वाळ कि आजकु दिन उत्तराखण्ड खूंणि खुशी कु दिन च। उन्न ब्वाळ कि हिळ पैट्रोळिंग अर इमरजेंसी रिस्पॉन्स खूंणि मिळि यूं गाड़ीळ उत्तराखण्ड पुळिस थैं जन सेवा अर अपड़ा कर्तव्य निर्वहन करणा मा आसानी ह्वैळी। उन्न ब्वाळ कि उत्तराखण्ड मा स्वास्थ्य अर सुरक्षा क समस्या क समाधान करणा खूंणि हंस फाउण्डेशन हमेसा अपणु सहयोग सरकार थैं देंणु राळु। उन्न ब्वाळ कि आज पुळिस थैं 21 गाड़ी मिळि ग्यीं । यां से राज्य मा 21 क्षेत्रु थैं एक सुरक्षा कवच मिळ जाळु।
पुळिस महानिदेशक अशोक कुमार न हिळ पैट्रोेळिंग व इमरजेंसी रिस्पॉन्स खूंणि हंस फाउण्डेशन क संस्थापक भोळे जी महाराज अर माता मंगळा क आभार ब्वाळ। उन्न ब्वाळ कि गाड़ी मिळण से पुळिस थैं हिळ पैट्रोळिंग अर इमरजेंसी रिस्पॉन्स मा बौत आसानी ह्वैळी। उन्न ब्वाळ कि प्रधानमंत्री मोदी न स्मार्ट पुळिस क परिकल्पा कायी छायी, ईं दिसा मा यू बौत अच्छु प्रयास च। यां से उत्तराखण्ड पुळिस थै जन सेवा करणा मा आसानी ह्वैळी।
ऐ मौका पर पुळिस विभाग क सब्बि बड़ा अधिकारी छायीं।