मुख्यमंत्री धामीन कायी ‘विकास पुस्तिका’ कु विमोचन

देरादूण। मुख्यमंत्री धामी नउत्तराखण्ड राज्य स्थापना दिवसा क 22वीं वर्षगांठ फर सूचना अर लोक सम्पर्क विभागा कु उर्यें कार्यक्रम मा भाग ल्यें। ऐ मौका फर मुख्यमंत्री न सूचना अर लोक सम्पर्क विभागा क छप्पि ‘विकास पुस्तिका’ कु विमोचन कायी।

सूचना अर लोक सम्पर्क विभागन उत्तराखण्ड सरकार क कर्या कामु थैं लेकैकि एक विकास पुस्तिका छाप्पि जैकु विमोचन मुख्यमंत्री धामीन कायी।

ऐ मौका फर मुख्यमंत्री न बोलि कि प्रदेस बण्यां 22 बरस ह्वैग्यें। उन्न बोलि कि यु 22 साळु मा हमन बौत उकाल-उंदार देखि। ऐ मौका फर उन्न राज्य क सबि राज्य आन्दोलनकारियों थैं नमन कायी। उन्न बोलि कि हमथैं सरलीकरण अर समाधान कु मंतर फर काम कैकि अगनै बढ़णा चैंदन। उन्न बोलि कि हमन जु नै उत्तराखण्ड बणौंणा कु सौं लियींच, वैथैं पूरू करणा खूंणि हमथैं अपडु काम करणा कु सगोर थैं बदलि करण प्वाड़ळु।

मुख्यमंत्री न बोलि कि मि सबि विभागु क अधिकारियों थैं ब्वन चांदु कि आज जै-जै ऐप कु लोकापर्ण ह्वै, वे फर काम भि हूंण चैंद। उन्न बोलि कि हम जु ब्वना छौं, वैथैं पूरू भि करदो।

ऐ मौका फर कैबिनेट मंत्री, विधायक अर देरादूण क मेयर अर प्रशासनिक अधिकारी सामिल छायीं।