मुख्यमंत्री न कायी बीज बम अभियान क सुरूवात

देरादूण। मुख्यमंत्री धामी न आज छंचर खूंणि मुख्यमंत्री कैम्प दप्तर मा बीज बम अभियान हफ्ता सुरू कायी।

हिमालय पर्यावरण जड़ी बूटी एग्रो संस्थान ‘जाड़ी’ कु यू बीज बम हफ्ता 9 जुलै बटि 15 जुलै तक चल्यें जालु।
ऐ मौका फर मुख्यमंत्री न पर्यावरण संरक्षण पर लेखीं किताब ‘हिमालय जन सरोकार’ कु विमोचन भि कायी।

मुख्यमंत्री धामी न बोलि कि हिमालय पर्यावरण जड़ी बूटी एग्रो संस्थान क द्वारिका प्रसाद सेमवाल न अगनै रै कैकि बीज बम अभियान थैं सुरू कैकि बौत अच्छु काम कायी। बीज बमळ बोण मा रैंण वला जानवरू थैं खाणा खूंणि मिलि जालु।

मुख्यमंत्रीन बोलि कि कुईं भि काम मनखियों क मदत से बडु़ अभियान बणद अर तबि सफल भि हूंद। उन्न बोलि ऐ काम खूंणि जादा से जाद मनखियों थैं अगने आणा प्वाड़लु।

उन्न बोलि कि हम अपणि आण वळि पीढ़ी थैं पर्यावरण थैं बच्यें कि दे सकदो, ऐ बारा हम हमथैं खडखडु़ ह्वै कैकि स्वचण प्वाड़ळु अर तड़तडु ह्वै कैकि अगनै बढ़ाण प्वाडलु।

मुख्यमंत्री पुष्कर सिंह धामीन बोलि कि 2025 मा उत्तराखण्ड राज्य स्थापना क रजत जयंती मनाळु। 2025 त उत्तराखण्ड थैं सब्यां तोकम मा अगने बणाणा खूंणि सरकार लगातार काम करणि च। उन्न बोलि कि विभागु, संस्थानु अर सामाजिक लोगुन थैं प्रदेस क भलै खूंणि क्या करै जै सकद ऐ बारा मा खास ध्यान देंण चैंद।

ऐ मौका फर डॉ. मोहन सिंह रावत ‘गांववासी’, बीज बम अभियान क संस्थापक द्वारिका सेमवाल अर अभियान से जुड्या मनखि सामिल छायीं।