मुख्यमंत्री धामी न चारधाम यात्रा क पूरणा वाटों थैं ख्वजणा खूंणि 25 मनखियों थैं झण्डा दिख्येकि फट्यायीं (भेजा)

मुख्ममंत्री धामी न सोमवार खूंणि अपड़ा घौर बटि चारधाम जात्रा का पूरणा वाटों थैं ख्वजणा खूंणि 25 मनखियों क एक दळ थैं हारू झण्डा दिख्येकि फट्यायीं ।

उत्तराखण्ड पर्यटन विकास बोर्ड (यूटीडीबी) न ट्रैक द हिमालय के दगड़ मा मिळि कैकि एक अभियान शुरू कायी। जैमा 25 विशेषज्ञ सदस्यों कु दळ चारधाम जात्रा क पूराणा वाटों थैं ख्वजणा खूंणि 1200 किळोमीटर से जादा क जात्रा कराळु। यु अभियान 50 दिुन तक चल्यें जाळु।

ऐ अभियान मा चारधाम जात्रा क रूड़ि अर ह्यूदों क वाटों थैं खुज्यें जाळु।
मुख्यमंत्री धामी न दळ क सब्बि मनखियों थैं शुभकामना द्यायी अर ब्वाळ कि हम खूंणि गर्व का बगत च कि हमरा चारधाम जात्रा क पुराणू वाटों थैं ख्वजणा खूंणि ज्वान ताकत च।

उन्न ब्वाळ कि या कोसिस हमरि बरसु पुरणि विरासत थैं बचाणा मा एक बौत बडु कदम च। उन्न ब्वाळ कि ऐ अभियान ळ उत्तराखण्ड मा साहसिक खेळु थैं भि अगने बणाणा कु मौका मिळळु।

ऐ मौका पर वखम सचिव पर्यटन दिलीप जावलकर, अपर सचिव युगल किशोर पंत, मुख्य कार्यकारी अधिकारी कर्नल अश्विनी पुंडीर, अपर निदेशक विवेक सिंह चौहान, अपर निदेशक श्रीमती पूनम चंद छायी।