दुबई मा ह्वीं 5450 करोड़ रुप्यौं कु एमओयू पर दसकत
देरादूण। मुख्यमंत्री धामी न आज दुबई मा उर्यूं ग्लोबल इनवेस्टर्स समिट कु उर्यूं रोड शो मा उद्योग समहौं क प्रतिनिधियौं क दगड़ मा बैठक कायी अर ऊथैं 8 अर 9 दिसम्बर खूंणि देरादूण मा हूंण वलु समिट मा आणा खूंणि आमंत्रित कायी।
मुख्यमंत्री क समणि आज दुबई मा उद्योग समूहौं क दगड़ मा 5450 करोड़ रुप्यौं कु इन्वेस्टमेंट कु एमओयू पर दसकत ह्वीं।
दुबई मा अबि तक सर बायेटेक अर हयात इंडिया क दगडि द्वी हजार करोड, कार्मिला न्यूट्रीशन टेक्नोलॉजी ग्रुपा दगड़ 950 करोड़ रुप्यौं कु , जीटीसी गु्रपा क दगड़ 800 करोड़ रुप्यौं कु फ्लो कॉग्लोमिरेट समूह क दगड़ मा 500 करोड़ रुप्यौं कु एमओयू पर दसकत कर्यें ग्यींन। एक्सले ग्रुप क दगड़ मैन्युफैक्चरिंग सेक्टर मा 700 करोड़ रुप्यौं कु , शरफ लॉजिस्टिक क दगड़ 500 करोड़ कु इन्वेस्टमेंट एमओयू दस्कत ह्वैग्यीन। उत्तराखण्ड प्रदेस क तरफि बटि सचिव उद्योग विनय शंकर पांडेय न एमओयू पर दसकत करिन।
मुख्यमंत्री धामी न बोलि कि भारत अर संयुक्त अरब अमीरात क बीच मा द्विपक्षयी सम्बन्ध अब पैलि से जादा कटकुटा ह्वैग्यीन। द्विया देसु का बीच मा व्यापार 20 प्रतिशत से जादा बढ़िग्यें। उन्न बोलि कि हमरि सरकार निवेशकु तैं प्रदेस मा सबि सुविधा देंणा खूंणि सदिन तय्यार च अर खास कैकि पिछल द्वी सालु मा प्रदेस मा निवेश करणा दिसा मा खुब कोसिस कर्यें ग्यायी। यीं कड़ी मा अब उत्तराखण्ड ग्लोबल इनवेस्टर्स समिट उर्यें जाणु च।
ऐ मौका फर कैबिनेट मंत्री डॉॅ. धन सिंह रावत, अपर मुख्य सचिव आनंद बर्द्धन, सचिव शैलेश बगोली, महानिदेशक उद्योग रोहित मीणा क दगड़ मा प्रतिनिधि मंडला हौरि लोग बि छायी।