माता श्री राजेश्वरी देवी कु सर्या जिंदगि मनखियों भले खूंणि समर्पित छायी : माता मंगला

नै दिल्ली। आध्यात्मिक गुरु माता राजेश्वरी देवी क पावन जन्मबार पर श्री हंसलोक आश्रम छतरपुर नै दिल्ली मा मातृशक्ति दिवसाक रूप मा मन्यें ग्यायी।

ऐ मौका पर श्री हंस लोक जनकल्याण सत्संग समारोह उर्रयें ग्यायी। समारोह मा माता श्री मंगला न ब्वाल कि माता श्री राजेश्वरी देवी अपड़ा बगताक महान आध्यात्मिक विभूति छायीं।

उन्न ब्वाल कि माता राजेश्वरी देवी न सर्या दुन्या मा अध्यात्माकु प्रचार कायी अर लाखों मनखियों क जीवन बदलि द्यायी। माता मंगला जी न ब्वाल माता राजेश्वरी देवी कु सर्या जीवन ज्ञान, प्रचार अर मनखियों क भले खूंणि समर्पित छायी। उन्न लोक्खु क जिकुड़ी मा ज्ञान क जोत बाळिक समाज मा पीड़ (प्यार), एकता अर सद्भाव कु संदेश द्यायी।

माता श्री मंगला जी न बतै कि आज द हंस फाउंडेशन सर्या देस मा राजेश्वरी देवी के नौ से गरीब नौन्याळों थैं पढ़ाणा खूंणि फ्री मा इस्कुल चलाणु च। माता श्री मंगला जी न समारोह म अयां सब्बि मनखियों से ब्वाल कि हमथैं माता श्री राजेश्वरी देवी क शिक्षा अर रैबार थैं अपड़ा जीवन में उतरणा क कोसिस करणा चैंद।

ऐ मौका पर श्री भोले जी महाराज अर माता श्री मंगला ज न हवन पूजा कायी अर श्री हंस लोक आश्रम मा बणणा वळु 1 लाख 44 हजार लीटर कु पाणि क टंकी की उद्घाटन भि कायी।

ऐ मौका पर भजन गायक श्रीमती नेहा खंकरियाल अर महेश लखेड़ा न माता क भेंट सूंणे कि भक्तिमय माहौल बण्यें द्यायी।