गैरसैंण मा उर्यें जालु मानसून सत्र

देरादूण। उत्तराखण्ड मानसून सत्र तैं लेकैकि अब या बात साफ ह्वेग्ये। बल मानसून सत्र 21 अगस्त बिटि 23 अगस्त तक भराड़ी सैंण, गैरसैंण मा उर्यें जालु। यां खुणि आदेश बि जारी ह्वेग्ये।

बतै दियां कि पिछल कैबिनेट बैठक म विधानसभा सत्र कख होलु यु फैसला लिंणा खुणि मुख्यमंत्री तैं अधिकृत करै ग्ये छायीं। जैका बाद संसदयी कार्य मंत्री या बारम साफ कै दे। 18 जुलै क हूंयी कैबिनेट बैठक म विधानसभा मानसून सत्र ब्लयें जाणा क बारम चरचा ह्वे छायीं पर दिन अर सत्र कख होलु यांक पर क्वीं बात नीं बणि। जैक बाद मुख्यमंत्री तैं अधिकृत कर्ये ग्ये। मानसून सत्र कख होलु अर कब होलु यु साफ नीं हूंण छायीं जै कारण विपक्ष लगातार भाजपा पर हमला करण छायीं। अर सरकार पर गैरसैंण क अंणदेखि करणा कु ठिकरु प्वड़णि छायीं।

विधानसभा क मानसून सत्र तै लेकैकि विधानसभा अध्यक्ष्ज्ञ ऋतु खण्डूड़ी न बतै कि विधानसभा सत्र बुलौंणा खुणि हमरि पूरि त्यारि च। सत्र गैरसैंण म हूंया या देरादूण हम पूर तरौं त्यार छा। उन्न बोलि कि विधानसभा सचिवालय म अबि तक 400 से जादा सवाल ऐग्यींन।