हिमालयी प्रदेस मा विधायकु तैं जड्डु लगणु च : हरीश रावत

गैरसैंण मा बजट सत्र नी करै जाणा से प्रदेसा मा एकदा राजनीति गरम ह्वेग्ये। एक तरफा जख 40 विधायकु न गैरसैंण मा जड्डु हूणा कारण बजट सत्र नीं करै जाण तैं लेकैकि एक चिट्ठी सरकार तैं लेखि। जै पर कैबिनेट न अपणि मंजूरी दे द्यायी।

जै पर पैल्यक मुख्यमंत्री हरीश रावत सरकार तैं गैरसैंणा उपेक्षा करणा कु आरोप लगै। हरीश रावत न बोलि कि उत्तराखण्ड हिमालयी प्रदेस च। हिमालयी प्रदेस मा विधायकु तैं जड्डु लगणु च त हिमालयी प्रदेस ब्वले जाण वळा उत्तराखण्डा क्य अवधारण रै जाली।

हरीश रावतन बोलि कि हम अपणु फैदा खूणि खळाखळ गैरसैंण कु नौं लिन्दौ अर जब वख सत्र उर्यौंणा बात आन्द त हम जड्डु कु बहाना बणै दिन्दन। उन्न बोलि कि हिमालय कु सुभौव च यख जड्डु बि होलि त बरखा बि होलि, ह्यूं, बोण अर उकाल बि होलि पर यां से सरकार तैं घबड़ाट (घबराहट) हूणि च।

हरीश रावतन बोल कि विधायकु न क्य बोलि, यां पर क्य बात करण। उन्न बोल कि सरकार तैं हर हाल मा गैरसैंण मा सत्र उर्यांण चैंद छायीं।