राजनीति कु मतलब . . . ?

सर्या दुन्या कु सबसे बडु लोकतंत्र भारत, कु लोकसभा चुना-2024 दुन्या कु सबसे मैंगु चुनौ हूंण वलु च।

सेंटर फॉर मीडिया स्टडीज क एक रिपोर्ट या बतौंणि च बल ऐसु साल चुनौ कु खरचा एक लाख बीस हजार करोड़ रुप्यौं खरचा दगडा-दगड़ि सर्या दुन्या कु सबसे मैंगु चुनौ होलु। साल 2019 म लोकसभा चुनौ कु खरचा से 2024 सा चुनौ म द्वि गुणा जादा रुप्या खरचा होला।

इन्न मा बडु सवाल हि यौ च कि आखिर चुनौ मा इगता खरचा किलै?

चुनौ मा इतगा खरचा राजनीतिक मूल्यों, घपरोल अर लोकतंत्रा कु खतम हूंण बि च। करोड़ो रुप्या खरच हूंणक कारण आज भल्ला लोगु खूणि राजनीति मा औंणा का बाटा बन्द हूंणा छन अर पैंसौंन सिरफ पैंसा वलों खूंणि नेता बणणा का बाटा खुलणा छन। जु सर्या लोकतंत्रा बन्दोबस्त तैं खराब करणा कु कारण बि बणणु च। या दिक्कदरि भारता हि ना बल बल सर्या दुन्या का सबि लोकतांत्रिक देसुक च।

18 वीं लोकसभा चुनौ मा सबि राजनैतिक दल अपणा फैदा खूणि कनिकैकिबि जादा से जादा बोट मिलणा तिकड़म भिड़ौंणा छन। एक प्रत्याशी चुनौ जितणा खूंणि करोडु रुप्या खरच करणु च।

सेंटर फॉर मीडिया स्टडीज रिपोर्ट म बतै ग्यायी कि चुनाव अभियान खूणि खूब पैसा उमेदवार अर राजनैतिक दलु तैं मिलदु।

ऐसु साल डिजिटल मीडिया जरिया खूब प्रचार प्रसार ह्वे। यांका बाद बि देस म 1950 म हूयूं पैलि चुनौ से आज 2024 म 500 गुणा जादा खरचा हूंणा अंताज च।

रिपोर्ट मुताबिक 2019 लोकसभा चुनौ म देस क 32 राष्ट्रीय अर प्रदेसा पार्टियों न सिरफ 2994 करोड रुप्यों कु खरचा दिखै। जैमा यु बतै ग्यायी कि राजनीतिक दलु न 529 करोड़ रुप्या उमेदवारू तैं चुनौ लड़णा खूणि दीन। रिपोर्टा मुताबिक चुनौ मा राजनीतिक दलु न निर्वाचन आयोग मा दियूं खरचा ब्यौरा अर सै खरचा (वास्तविक) क दगड़ि उमेदवारू तैं दियूं खरचा मा बौत फरक छायीं।

सेंटर फॉर मीडिया स्टडीज का अध्यक्ष एन भास्कर राव न बोलि कि 2020 अमेरिका चुनौ पर हूंया खरचा बराबर च जु 14.4 बिलियन डॉलर मतलब 1 लाख 20 करोड़ रुप्या च। उन्न बोलि कि दूसर शब्दु मा ब्वलें ज्यां त भारत मा 2024 दुन्या कु सबसे बडु़ चुनौ अब तक कु सबसे मैंगु चुनौ साबित होलु।

लोकसभा चुनौ म भाजपा, कांग्रेस,सपा , बसपा, तृणमूल कांग्रेस सबि दल अर ऊंका उमेदवारु न चुनौ मा अपणु खजानु खोलि दे।

साफ च की यु चुनौ जनमुद्दा खूणि न, बल राजनीतिक दल अपणा-अपणा फैदा करणा वास्तौं का वादों पर जादा हूंणू च।

अब अगर मुद्दों तैं छोड़िकि बात कर्यें ज्या त ज्वा बात सबसे खास च वा या च कि ऐसु चुनौ इतिहास कु सबसे जादा खरच करण वलु चुनौ साबित हूणू च। चुनौ जितणा खूणि प्रत्याशी सबि कुछ करणा छन। सबि दल पैसों का बल पर चुनौ जितण चाणा छन। जनता से जुड़या मुद्दा अर समस्या से ऊतैं क्वीं मतबल नीं च। क्वीं बि नेता आज सेवा भाव अर ईमानदारी से चुनौ लड़ण नी चांणु च। आज नेतों तैं विकास, जनसेवा, रुजगार, जन्ना मुद्दौं पर बात करणि कु क्वीं मतबल नी रैग्यायी। सबि पार्टी जनतै कु ठट्टा (मजाक) लगौंणि छन, राजनीति आज धन्धा बणिग्ये अर सिरफ अपणु फैदा अर पैंसा कमौंणु राजनीति कु मकसद ह्वेग्ये।

अब जरा स्वाचा कि जु लोग चुनौ जीतणा खूणि इतगा पैंसा खरच कै सकदिन वु चुनौ जितणा बाद क्य कारला? पैलि अपणा कीसा (जेब) त भ्वारला।