मनखियों क सेवा करणु हमरू काम च : माता मंगळा जी
दून विश्वविद्यालय मा उर्यू कार्यक्रम दीक्षान्त समारोह मा दून विश्वविद्यालय क चांसळर अर उत्तराखण्ड क राज्यपाल गुरमीत सिंह न हंस फाउन्डेशन क प्ररेणा माता श्री मंगळा जी थैं डी. ळिट मानद उपाधि से सम्मानित कायी।
ऐ मौका पर उत्तराखण्ड के महामहिम राज्यपाळ न ब्वाळ कि माता श्री मंगळा जी हमेसा जिकुड़ि से समाज सेवा करणा खूंणि त्यार रैंदन। माता जी हमर देस मा न हि बल्कि सर्या विश्वमा सेवा खूंणि हमेसा त्यार रैंदन। राज्यपाळन ब्वाळ कि भग्वान सब दय्खणु च, अर भगवान कु आशीर्वाद हमेसा माता जी क दगड़ा च।
हंस फाउण्डेशन का प्रेरणा माता मंगळा जी न ब्वाळ कि दीक्षांत समारोह कार्यक्रमा कु विषय च ‘सशक्त महिळा, सशक्त राष्ट्र’, सच्च मा जब महिळा सशक्त ह्वैळी तब हि देस भि सशक्त ह्वाळु। उन्न ब्वाळ कि हम भारत क मनखि देवियों का पूजा करदों। अर मि देय्खणु छौं कि हमरि नौंनी कतगा अगने जाणि छन, हमरि नौंनी डिग्री ळिंण मा भि अगने छन। नौंनी हमर देस क भविष्य छन। सब्बि उपाधि लिंण वळों थैं मेरी बौत-बौत बधै।
माता श्री मंगळा जी न ब्वाळ कि हंस फाउण्डेशन देस अर प्रदेस क मनखियों थैं सब्बि तरौं क सुविधा देंणा कु प्रयास करणु च। उन्न ब्वाळ कि सतपुळी क अस्पताळा मा सुपर स्पेशळिस्ट डॉक्टर आणा छन।
उन्न ब्वाळ कि मनखियों क सेवा करणु हमरू काम च, अर जौं थैं दरकार (जरुरत) च ऊंकी सेवा हम हमेसा करणा रौळा।