56 साल बाद ह्वे शहीद कु अन्तिम संस्कार
चमोली। चमोली जिलका कोलपुड़ी गौं का रैवासी शहीद ज्वान नारायण सिंह कु आज ऊंका पैतृक घाटम सैनिक सम्मान दगड़ि अंतिम संस्कार करे ग्यायी। शहीद नारायण सिंह तैं ऊंका भतिजु जयवरी अर सुजान सिंगन मुखाग्नि द्यायी।
बतै दियां कि चमोली क थराली ब्लॉका कोलपुड़ी गौं का रैवासी नारायण सिंह सेनाम सिपैक पद पर छायीं। 7 फरवरी 1968 खुणि नारायण सिंह अर ऊंका दगड़ि 102 ज्वान सेनाक जहाज चंडीगढ़ बिटि लेह बिटि जाणा छायीं। रोहतांग दर्रा म जहाज दुर्घटनाग्रस्त ह्वेग्ये अर सबि ज्वान शहीद ह्वेग्यीन। जौ तैं ख्वजण खुणि सेनान बौत बगत बिटि
सर्च ऑपरेशन चलाणि छायीं।
यां से पैलि 2003 म पांच ज्वानु का पार्थिव शरैल मिलिन। साल 2018 म बि एक ज्वान कु पार्थिव शरैल मिलिन त वखि अब 56 साल बाद चार हौरि ज्वानु का पार्थिव शरैल मिलिन। जैमा नारायण सिंह कु पार्थिव शरैल बुधवार खुणि गौचर पौंछि। आज शहीदु कु पार्थिव शरैल तैं ऊंका गौं कोलपुड़ी पौंछि। जैका बाद सैनिक सम्माना दगड़ि उंका पैतृक घाट पर शहीद कु अन्तिम संस्कार करे ग्यायी।
ऐ मौका पर थराली विधायक भूपाल राम टम्टा, उप जिलाधिकारी अबरार अहमदा दगड़ि क्षेत्रा लोग बि छायीं।