माननीयोंक भेषम “सड़क छाप गुण्डा”
खानपुर उत्तराखण्डम ज्वा घटना ह्वे, यीं घटना सब्यौं कु झक्क कै द्यायी। दिन दुप्फरा खटाखट गोलीबारी की सुणिकि लोगम घबड़ाट ह्वेग्ये।
खानपुरा विधायक उमेश कुमार कर घौर म बन्दुक लेकैकि दिन दुप्फरा गोली चले अर यांकु वीडिया सोशल मीडिया मा डालि। वीडिया मा साफ दिख्येंणु च कि खानपुरा पैल्यक विधायक कुंवर प्रणव मां-बणै गाली देकि फैर करणा छन। वीडिया देखिकि इन्न लगणु च कि जन्नि क्वीं फिलमा सूटिंग हूंणि होलि। जैन बि यु वीडिया देखि वु स्वचणु च क्या देवभूमि मा इन्नु ह्वे सकदू।
कुवंर प्रणव कु नौं सदिन विवादु मा रायीं। फिर वु तमंचे पर डिस्को कु मामला हूयां या फिर मगरमच्छ पर गोळी चलौंणा कु मामलु।
साल द्वी हजार छै मगमच्छ पर गोळी चलौंणा मामला मा कुवंर खुब चर्चा मा रैंन। ऊ पर हरद्वारम वन्य जीव संरक्षण अधिनियम कु उल्लंघन करण कु आरोप बि लगि। द्वी हजार छै म बहादराबाद रोडवेज बस पर सैड नी दिंणा कारण प्रवणन डरैबर फर गोळी चलै। 2010 मा मंगलौर एक कार्यक्रम मा प्रणव न गोळि चले दे छायीं।
साल 2013म हरक सिंह रावत क घौर मा उर्यूं एक कार्यक्रम मा उन्न गोळि चले दे। गोळी राज्य आंदोलनकारी विवेकानन्द खंडूडी क खुट्टा मा लगि।
2018 म अपणि पार्टीक विधायक देशराज कर्णवाल दगड़ि ऊंकु विवाद बि खुद चर्चा म रायी। साल 2019सम दिल्ली उत्तराखण्ड सदनम एक पत्रकार पर चटकताळ (थप्पड़) मरणा कु आरोप प्रणव पर।
कुवंर प्रणव कु राजनीतिक सफर जतगा लम्बू च उतगा हि विवादु से घिर्यूं बि च। अबि कुवंर खानपुरा निर्दलीय विधायक उमेश कुमार शर्मा से तकरार तैं लेकैकि छ्वींयों मा छन।
खानपुरा घटना वास्ता जतगा जिम्मेदार कुंवर प्रणव छन त उमेश कु कुछ कम जिम्मेदार नीं। अबि कुछ दिन पैलि उन्न कुंवर प्रणव लंढौरा घौर पौंछिकि ऊंतैं गालि दींन, अर खूब बुरु-भलु बोलि अर भुगतणा धमकी द्यायी।
यखम सवाल प्रदेसा कानुन बन्दुबस्ता पर बि च। सवाल खानपुरा जनता पर बि छन, जौन इन्न लोगु तैं माननीय बणै अर ऊतैं मुण्डम धैरि? आज हमरा यीं माननीय, जौ का कांधौं पर कानुन बदबस्ता जिम्मेबरि बि च, सड़कियों पर सड़क छाप लफन्डरू तरौं एक दुसरा तैं मां-बैणि क गाली दिंणा छन अर एक दुसरा पर बन्दूक दिखै की अपणि हनक दिखौंणा छन।
द्वी माननीयों क बीचा लडै़ की यीं घटना न उत्तराखण्ड जन शांत प्रदेस तैं सर्या दुन्या म बदनाम कै दे। यू द्वियौं न देवभूमि उत्तराखण्ड नौं पर दाग लगौंणा काम कायी।
यु द्विया सड़क छाप माननीय पर सखत कारवै हूंण चैंद अर उमेश कुमार विधायकी खतम करे जाण चैंद अर द्वियौं पर सदनिक वास्ता चुनौ लड़णन पर रोक लग्यें जाण चैंद।