अंकिता भण्डारी कतल क जांच सीबीआई से करणा क मांग, महिला कांग्रेस न कायी विधानसभा कूच

गैरसैंण। गैरसैंण मा विधानसभा सत्र कु चौथु दिन मा आज महिला कांग्रेस न अंकिता भण्डारी कतल कु मामला मा प्रदर्शन कायी।

महिला कांग्रेस न अंकिता कतल मा वीआईपी कु नौ बत्यें जाणा क मांग थैं लेकैकि विधानसभा कूच कायी। पुळिसन दिवाली खाल मा बैरिकेंटिग लग्यें कि ऊथैं वखिम रोकि दे, या स नराज ब्यटुळा बीच सड़कि मा बैट्ठिी ग्यीं। ब्यटुळों न पुलिस अर सरकार खिलाफ खूब नारा बाजी कायी।

अंकिता भण्डारी कतला क जांच सीबीआई से अर कतल करण वळों तैं जल्दी सजा दियें जाणा खूंणि आज महिला कांग्रेस न विधानसभा गैरसैंण कूच कायी।

ऐ मौका फर देरादूण, पौड़ी, चमोली, टिरी, उत्तरकाशी, रुद्रप्रयाग, अल्मोड़ा जिळा बटि बौत सर्या ब्यटुळा अयां छायीं।

महिला कांग्रेस क अध्यक्ष ज्योति रौतेला अर दिव्या रावत एक कुड़ा मा पौंचिग्यीं , त एक ब्यटुळा जंगळा क बाटु बटि विधानसभा जाणि लगिग्यें। पुळिसन बड़ि मुसिकल से वैंथैं रोकि। जैका बाद पुळिसन सबि ब्यटुळों थैं गिरफ्तार कैकि मेहलचौंरी जेल मा भेजि दे।

महिला कांग्रेस अध्यक्षा ज्योति रौतेळा न बोलि कि अंकिता भण्डारी कु कतल थैं 6 मैना से जादा ह्वैग्यीं पर वीआईपी कु नौ अबि तक समणि नी ऐ अर पुळिस क चार्ज सीट मा अबि तक कुछ बि साफ नी ह्वै साकी। उन्न बोलि कि जब तक अंकिता भण्डारी थैं निसाब नी मिलळु तब तक कांग्रेस सड़क्यों मा अवाज उठाणि राळी।