लापरवै की उड़ान

उत्तराखण्डम हवै हादसा रुकण कु नौं नी लिंणा छन। बाबा केदार क पाट खुलयां लगभग द्वी मैना ह्वेग्येन अर द्वी मैनौं भितर प्रदेसम पांच हवै हादसा ह्वेग्यींन। जैमा उत्तरकाशी जिलम गंगनानी हेलिकॉप्टर हादसम पांच लोग मौत ग्ये छायीं, त वखि 15 जून केदारघाटिम आर्यन एविएशन प्राइवेट लिमिटेउ कु हेलीकॉप्टर हादसा कु सिकार ह्वेग्ये।
जैमा पायलट दगड़ि साल लोग ज्यूंदा जलिकि रंगडु़ ह्वेग्येन। 8 मई 2025 गंगोत्री जाणु हेलिकॉप्टर हादसा ह्वे जैमा 6 लोगु कु मौत ह्वेग्ये। 12 मई 2025 बदरीनाथ म हेलीकॉप्टर ब्लेड वाहन से भिड़िग्ये। 17 मई 2025 एम्सा हेली सेवा की एम्बुलेंस केदारनाथ हादसा कु शिकार ह्वे। 08 जून 2025 बड़ाूस हेलीपैड स उड़ददा हेलिकॉप्टर सड़किम ऐग्ये। 15 जून खुणि गौरीकुण्डम आर्यन एविएशन कु हेलीकॉप्टर दुर्घटना कु सिकार ह्वेग्ये जैमा सात लोगु ज्यूंदा फुक्यें ग्यींन। इन्न मा उत्तराखण्ड प्रदेसम खळाखळ हूंणा हेवी हादसा तैं लेकैकि सवाल खड़ा हूूंणा छन।

सवाल हवै सेवा कम्पनी पर बि छन, किलैकि वु हवै मानकु की उल्लंघन करणा छन। केदानाथम हेलीकॉप्टर दुर्घटना कु कारण मौसब बतै जाणु च। पर यखम सवाल यौं च कि मौसम खराब छायीं, त हेलीकॉप्टर उड़ौंण की मंजूरि कैन द्यायी? अर क्य हेलीकॉप्टर पायलट तैं या बात पता नीं छायीं कि मौसम खराब च? यां से बि बड़ु सवाल जब आर्यन एविएशन तैं 15 जून खुणि सुबेर छै अर सात बजि बीच उड़ान भ्वरणा कु बगत मिल्यूं छायीं इन्न मा सवाल यौं च कि हेलीकॉप्टरन सुबर 5.300 बजि उड़ान भ्वरण मंजूरि कैन द्यायी? यु उत्तराखण्ड नागरिक उड्डयन विकास प्राधिकारण अर नागर विमानन महानिदेशायल क बणयां मानकु कु उल्लंघन नीं त क्या च?

साफ च हेली कम्पनी अपणु फैदा खुणि हवै नियमु कु खुब उल्लंघन करदन। जादा से जादा जातरियों तै लिजाणु, बिना मौसम बारम बिना जाणकारी कु उड़ाण भ्वरणु अर हेलीकॉप्टरा तकनीकी लापरवै बार-बार समणि आणि रैंद।

यखम सवाल योंच कि यांकु जिम्मेबार कौच? या दुर्घटना न बल प्रसासनिक लापरवै कु नतीजा हि ना बल हेली कम्पनी कु जादा पैसा कमौंण अर सुरक्षा मानकौं कु उल्लंधन कु नतीजा बि च। इन्न मा भवेष्यम इन्नि दुर्घटना ना हूंया या का वास्ता सरकार तैं चैंद कि नियमु कु उल्लंघन करण वलि हेवी सेवा पर कठोर कारवै करे ज्यां, जनकैकि उत्तराखण्डम हवै सफर तैं सुरक्षित बण्यें जै सक्यां।