सतपुली मा बणलु तलौ (झील), मुख्यमंत्रिन कायी शिलान्यास, बोलि तलौ कु फैदा कै पीढ़ियों तक होलु

मुख्यमंत्री धामिन आज पूर्वी नयार सतपुली मा बणण वलि सतपुली तलौ (झील) कु शिलान्यासा दगड़ा-दगड़ि एक सौ बहत्तर करोड़ पैंसठ लाख रुप्यौं की विकासा योजनौं कु लोकार्पण अर शिलान्यास कायी। जैमा 123.53 करोड़ रुप्यौं की 04 योजनाओं कु शिलान्यास अर 49.12 करोड़ रुप्यौं की 20 योजनाओं का लोकार्पण सामिल च।

ये मौका पर मुख्यमंत्रिन विकाखण्ड बीरोंखाल कु राजकीय इण्टर कॉलेज भरोली खाल मा नै भवन , विकासखण्ड एकेश्वर अर कल्जीखाला बीच नयार पाटीसैंण अर अस्वाल्स्यूं बीच पश्चिमी नयार म मोटर पुळ, विकासखण्ड एकेश्वर मुख्यालय मा मिनी स्टेडियम, रवांसा नदी पीपलडोग पुळ से 500 मीटर मत्थी बैराज बणौंणा अर ताडकेश्वर महादेव मा पुलिस चौकी ख्वलणा की घोषणा कायी।

मुख्यमंत्रिन बोल कि आज 172 करोड़ से जादा योजनौं कु लोकार्पण अर शिलान्यास करे ग्यायी। उन्न बोलि या योजना क्षेत्रा विकास वास्ता मील कु पत्थर साबित होलि। सतपुली तलौ (झील) बणणा बाद, सर्या तोका अर्थव्यवस्था वास्ता वरदान साबित होलि। मुख्यमंत्रिन बोलि आज जै तलौ कु शिलान्यास करे ग्यायी। वैकु फैदा पीढ़ियों तक होलु। मुख्यमंत्रिन बोलि कि प्रदेसम सड़क, ह्वै कनेक्टिविटी क दगड़ि खळाखळ विकास करे जाणु च।

मुख्यमंत्रिन बोलि कि प्रदेसा सांस्कृतिक पछ्याण तैं बचौंणा वास्ता हम मिलिकैकि काम करणा छा। प्रदेसम 5000 एकड़ से जादा जमीन पर बिटि कब्जा हट्ये ग्यायी। उन्न बोलि कि 2025 जनवरी तक हम प्रदेसम यूसीसी लागू करण छौ अर बौत जल्दी प्रदेस कटकुटु भू-कानून बि ल्याण वला छा।

ऐ मौका पर मुख्यमंत्रिन चौबट्टाखाल विकास पोथी कु बि विमोचन कायी।

पर्यटन मंत्री सतपाल महाराजन बोलि सर्या तोकम विकासा काम खळाखळा करे जाणा छन। उन्न बोलि सतपुली तलौ बणणा बाद यख वॉटर स्पोर्ट्स का खेल उर्यें जाला। यख दूर-दूर बिटि पर्यटक आला अर तलौं कु आनंद ल्याला। उन्न बोलि बल सर्या तोकम तैं पर्यटना रुपम विकसित करणा वास्ता सतपुली तलौ बौत फैदा मंद होलु।

ऐ मौका पर विधायक पौड़ी राजकुमार पोरी, विधायक लैंसडाउन महंत दिलीप रावत, गौ सेवा आयोग के अध्यक्ष डॉ. राजेंद्र अंथवाल, भाजपा जिलाध्यक्ष कोटद्वार वीरेंद्र रावत, जिलाध्यक्ष पौड़ी श्रीमती सुषमा रावत, जिलाधिकारी डॉ. आशीष चौहान बि छायी।