हमरू पैलु काम बरखा न जु बि चीज गंजमंज (अस्त व्यस्त) हूयीं छन ऊतैं ठीक करण कु च: मुख्यमंत्री धामी
कोटद्वार । प्रदेसा मुख्यमंत्री धामी न आज कोटद्वार मा आपदाग्रस्त तोक मा जैकि वखक स्थिति तैं देखि।
ऐ मौका फर मुख्यमंत्री क दगड़ मा कोटद्वारा विधायक ऋतु खण्डूडी बि छायीं।
मुख्यमंत्री मालन नदी मा हल्दूखाता, किशनपुर, सिगड्डी मा जैकि देखि अर अधिकारियौं तैं निर्देश दी कि तेजी से ळोगु क मदत कर्यें ज्यां उन्न बोलि कि टूटि सड़कियौं तैं ठीक कर्यें ज्यां अर आपदा पीडितु क मदत करणा क निर्देश दीं।
मुख्यमंत्री न बोलि कि जख पाणि भ्वरयूं च वख पाणि निकळणा कु काम पैलि कर्यें ज्यां।
ऐ मौका फर मुख्यमंत्री न बोलि हमरि पैलि कोसिस च कि बरखा न जु बि चीज गंजमंज (अस्त व्यस्त) हूयीं छन ऊतैं ठीक करण क च। जु मनखि आपदा मा छन, वु तैं पैळि राहत अर मदत देंणा च। वैका बाद आपदा मा जु बि नुकसान ह्वै ऊं थै ठीक करणा कु काम च।
ऐ मौका फर मुख्यमंत्री क दगड़ मा विधानसभा अध्यक्ष ऋतु खण्डूड़ी बि छायीं। ऋतु खण्डूड़ी न बोलि कि मुख्यमंत्री न आज आपदा तोक मा ऐकी यखक हलात देखि अर अधिकारियौं तैं निर्देश दीं कि स्थिति तैं झट्ट ठीक कर्यें ज्यां। ऋतु खण्डूडी न यां खूंणि मुख्यमंत्री तैं धन्यवाद बोलि।