केदारनाथ अर हेमकुंड साहिब रापेवे तैं मिलि केन्द्र सरकारा मंजूरि

देरादूण। मुख्यमंत्री धामिन सोनप्रयाग बिटि केदारनाथ अर गोविन्दघाट बिटि हेमकुंड साहिब वास्ता रोपवे विकास खुणि केन्द्रीय मंत्रीमण्डलन मंजूरि दिये जाण पर प्रधानमंत्री कु अभार बोलि। मुख्यमंत्रिन बोलि कि देवभूमि उत्तराखण्ड औंण से पैलि प्रधानमंत्रिन प्रदेस तैं द्वी बड़ी सौगात दे दींन। मुख्यमंत्रिन बोलि कि केदारनाथ अर हेमकुण्ड साहिब खुणि रोपवे बणण से श्रद्धालुऔं तैं भगवान केदारनाथ अर हेमकुण्ड साहिब का दर्शन करणा वास्ता सजिलु ह्वे जालु। बतै दिया कि मुख्यमंत्रिन नै दिल्लीम प्रधानमंत्री से द्विया रोपवे बणौंणा की विनति कै छायीं।

मुख्यमंत्रिन बोलि कि प्रधानमंत्री कु देवभूमि उत्तराखण्ड दगड़ि खूब लगौव च। अर ऊंका मार्गदर्शन मा उत्तराखण्ड सबि तौकु मा सर्या देस म अग्वानया प्रदेस बणदा जाणु च। प्रधानमंत्री क नेतृत्वा म केन्द्र सरकार कु सबि क्षेत्रम पूरि मदत मिलणि च। श्री केदारनाथ धाम कु पुनर्निर्माण, श्री बदरीनाथ धाम कु मास्टर प्लान कु काम हूंणू च जै से औंण वलु बगतम प्रदेसम ह्यूंदा मैनौं की जातरा म बौत जातरी आला।

प्रधानमंत्री क अध्यक्षतम आर्थिक मामलों क कैबिनेट समितिन सोनप्रयाग बिटि केदारनाथ तक 12.9 किलोमीटर रोपवे परियोजना बणौंण तैं मंजूरि दे द्यायी। परियोजना कु डिजायन, निमा्रण वित्त संचालन अर स्थानांतरण मोडम 4081.28 करोड़ रुप्यौं क लागत से बण्यें जालु।