केदारनाथ मा हादसा, आखिर कब खुलला युकाडा का आंखा ?

केदारनाथ धाम मा हेलीकॉप्टर क् पंखौं न एक ज्वान अधिकारी क म्वरण क कारण ळोग दुखी छन। जै न बि या बात सुंणि वु सन्न ह्वैग्यें। ऐ हादसा न एकदां दुबरा ह्वै कम्पनी क मानकौं क पोल खुलिग्यें।

मामळु इल्लै जादा खास च कि हादसा मा जै अधिकारी अमित सैनी क मौत ह्वै वु उत्तराखण्ड नागरिक उड्डयन विकास प्राधिकारण (युकाडा) मा वित्त नियंत्रक क पद पर छायीं अर केदारनाथ जातरा सुरू हूंण सै पैलि केदारनाथ मा हेली सेवा से जुड्यां बन्दबस्त तैं दय्खणा खूंणि पौंच्यूं छायीं।

बतै दियां कि युकाडा प्रदेसा क एजेन्सी च। जु हेली सेवा से जुड़या सुरक्षा मानकु , बन्दबस्त तैं दय्खण कु अर वैथैं बस (नियंत्रण) मा करणा कु काम करदि।

पुलिसा क बतै कि यु हादसा दिनमा केदारनाथ मा जीएमवीएन हेलीपैड मा तब ह्वै जब अमित सैनी हेलीकॉप्टर मा बैठणा खूंणि जाणा छायीं, तबि वैकु पिछने कु पंखा मा ऐग्यीं। हादसा मा अमित सैनी धौंण (गर्दन) पिछने कु पंखा मा ऐग्यें, जै से ऊंकी वखम हि मौत ह्वैग्यें।

यखम दय्खण वळि बात या च कि जब अमित सैनी तैं हेलीकॉप्टर मा बैट्ठयें जाणु छायीं, वै बगत हेलीकॉप्टर कु रोटर चलणु छायीं। उबरि हेली शटल सर्विस मा नी छायीं जै कारण से हेली मा बैट्ठण वळु टोलि तैं रोटर बन्द कैकि बैठ्यें जाणा छायीं। सवाल यौं च कि क्या हैंडलर अर ग्राउण्ड स्टाफ क बिना जातरियौं तैं बिना रोटर बन्द कैकि बैठ्यें जाणु चैंद?

उत्तराखण्ड मा हेली सेवा मा लगि कम्पनियों अर युकाडा क सांठगांठ क बारा मा सबि तैं पता च। युकाडा क तरफ बटि हूंण वलि लापरवै क कारण हेली कम्पनियौं मानकु तैं त्वड़णि रंदन अर जन्न चांदन उन्न काम करदन। उथैं जातरियौं क सुरक्षा क क्वीं परवा नी रैंदि। या बात हम सुदि न ब्वना छा, पिछळ साल जादा किमत मा टिकट ब्यचणा कु मामळा हूयां या सुरक्षा मानकु तैं त्वड़ण क् शिकैत मिलणि रैंद छायीं। पिछळ 12 साळु मा केदारघाटी मा सात बार हेलीकॉप्टर क दुर्घटना ह्वै। जैमा 26 मनखि टुणपट ह्वैग्यीं। जैका बाद बि युकाडा क तरफ बटि क्वीं कारवै नी कर्यें ग्यें।

वु त भल्लु हूयां नागर विमानन महानिदेशालय कु , जै न पिछळ साल 2022 मई मा अचाणचक अपड़ि टोळि तैं केदारनाथ मा भेजिकि हेली सेवा कु सुरक्षा मानकौं कु आडिट कायी। वै बगत केदारनाथ मा शटल सेवा देंणि सबि हेली कम्पनी सुरक्षा मानकौं की अनदेखी करणि छायीं। जै कारण डीजीसीए न 5 हेली कम्पनी पर 5 -5 लाख रुप्यौं कु डांड लग्यें। जैमा द्वी हेली कम्पनी क सबि पायलटौं क लाइसेंस तीन मैना खूंणि रद्द कै दे छायीं।

हेली कम्पनी क लापरवै क कारण युकाडा कु ज्वान अर प्रतिभावान अधिकारी हमर बीच मा नीं च। मुख्यमंत्री धामी न जांच क् आदेश दे दीं। उमेद च क् जांच क बाद सच समणि ऐ जाळु अर बन्दबस्त मा सुधार दय्खणा खूंणि मिललु।