केदारनाथ क गर्भगृह कु एक औरि वीडियो ह्वै वायरल, साफ च बल गर्भगृह मा सुनु लगौंणा मा कुछ त घपरोल जरुर ह्वै

देरादूण। भगवान केदारनाथ क गर्भगृह मा सुनु लगौंणा कु मामळु तैं जख प्रदेसा पर्यटन मंत्री अर बदरी -केदार मंदिर समिति एक चाळ बतौंणा छन। मंदिर समिति अब अपड़ि सफै देंणि च अर बतौंणि च कि दानताता क भावना तैं देखिकि मंदिर समिति न बोर्ड बैठक मा गर्भगृह मा सुनु लगौंणाा क मंजूरि दे छायी।

बीकेटीसी क मीडिया प्रभारी न हरीश गौड़ न बोलि कि भारतीय पुरातत्व सर्वेक्षण विभााग क जणगुरू क रेख देख मा गर्भगृह मा सुनु लगौंणा कु काम ह्वै छायीं। दानदाता न सुनु मूल्यें अर गर्भगृह क पाळि मा लगौंणा कु काम बि दानदाता त तरफ बटि हि कर्यें ग्यें। उन्न बोलि कि बीकेटीसी न आयकर अधिनियम क धारा-80 कु प्रमाण पत्र बि नीं मांगि। उन्न बोलि अब कुछ ळोग चाळ चलणा छन अर केदारनाथ धाम मंदिर समिति क पछ्याण तैं खराब करणा छन।

त दुसर तरफि आज एक औरि वीडिया सोशल मीडिया मा रिट्णु च। वीडियो मा दिख्येणु कि केदारनाथ मंदिर क गर्भगृह मा सुना क पौलिस कर्यें जाणि च। आज इत्वार खूंणि जनि यीं बातिकु तीर्थ पुरोहितु तैं पता चलि उन्न उन यु काम रुक्वैं दे।

मंदिर क गर्भगृह मा सुनु क पीतळ बणणा क खबर अर अब सुनु पर पौलिसा क खबर न ऐ मामला मा घमाचूर ह्वैग्यें।

जाणकारि च कि आज सुबेर केदारनाथ मंदिर गर्भगृह मा सुना क पौलिस लग्यें जाणा कु काम कर्यें जाणु छायीं। जनि या बात केदारनाथ पुरोहितौं तैं पता चलि उन काम रुक्वें दे। केदारसभा क अध्यक्ष राजकुमार तिवारी, विनोद शुक्ला, राजकुमार तिवारी, विनोद शुक्ला, बगवाड़ी अर औरि तीर्थ पुरोहितौं न यांकु विरोध कायी अर जांच करणा क मांग कायी।

जख एक तरफ मंदिर समिति गर्भगृह मा लग्यूं सुनु क पितळा मा बदलि हूंणा म अपड़ि सफै देंणि च त वखि आज केदारधाम मा मंदिर गर्भगृह कु वीडिया साफ बतौंणु च कि केदार बाबा क गर्भगृह मा सुनु लगौंणा मा कुछ त घपरोल जरुर ह्वै। इन्ना अब जांच हूंण चैंद अर दूदा कु दूद अर पाणि कु पाणि हूंण चैंद।