कारगिल विजय दिवस फर जारी संदेशम मुख्यमंत्री न बोलि- देस खुणि अपणि जान देंण वला वीर शहीदु कु बलिदान तैं देस सदनि याद राखलु

मुख्यमंत्री धामिन कारगिल विजय दिवसा एक दिन पैलि जारी संदेशम भारतीय सेना कु साहस अर शौर्य तैं नमन कायी अर बोलि कि देस खुणि अपणि जान देंण वला वीर शहीदु कु बलिदान तैं देस सदनि याद रखलु।

मुख्यमंत्रिन बोलि कि कारगिल युद्ध मा उत्तराखण्डम वीर सपूतौं न अग्वानया (अग्रणी) काम कायी अर अपणि जान द्यायी। वुंकु बलिदान सदनि हमतैं प्रेरणा दिंणु रालु। मुख्यमंत्रिन बोलि कि हमर सैनिकौंन सदनि देस कु मान बढ़ै जै फर हमतैं गर्व च। उत्तराखण्ड देवभूमिक् दगड़ि वीर भूमि बि च। छ्वटु प्रदेस हूंणा बाद देस रक्षम हमरि खुब योगदान रैंन्दु। वीरभूमि उत्तराखण्डम पीढ़ियों बिटि हरेक परिवार बिटि वीर अर वीरांगना देसा रक्षम अपणु योगदान देंणा छन। हमतैं अपणि सैनिक परम्परा अर देस भक्ति की विरासत पर गर्व च।

मुख्यमंत्रिन बोलि कि प्रदेस सरकार सैनिक अर पैल्यक सैनिक अर ऊंकी कुटुम्दरि कु सम्मान अर कल्याण वास्ता सदिन त्यार च। मुख्यमंत्री धामिन कारगिल विजय दिवसा एक दिन पैलि परमवीर चक्र विजेता सैनिकों तैं मिलणि वलि अनुग्रह राशि डेढ़ करोड़ रुपए कै द्यायी अबि तक 50 लाख रुप्या दिये जाणा छायीं।

मुख्यमंत्रिन बोलि कि हमरु देस की सीमा हमर वीर ज्वानु क शौर्य, साहस अर बलिदान कारण सुरक्षित छन। इन्न मा हरेक मनखि की जिम्मेबरि च की वु सैनिकु की वीरता, समर्पण अर बलिदान कु सम्मान कर्या।