करन माहरा न भाजपा फर लग्यें जमीन कब्जा करौंणा कु आरोप

देरादूण। उत्तराखण्ड मा भाजपा सरकार खळाखळ कब्जा कैकि बण्यां धार्मिक स्थळु मा त्वड़णि च अर नाम देंणि च लैंड जैहाद। करण माहरा न बोलि मि आज भाजपा क लैंड जेहाद क बात बतौंणु छाैं। प्रदेस अध्यक्ष करन माहरा न बोलि भाजपा बटि पार्षद र्यां अजय सिंघल न लोक सूचना अधिकारी नगर निगम देरादूण बटि 30 मार्च 2022 खूंणि चिट्ठी लेखिक सूचना मांगी छायी पर अजय सिंघल थैं जु जवाब दे वै मा कुछ बि साफ नीं च । इन्न मा उन्न दुबारा अपील मा 1 सितम्बर खूंणि सूचना देंणा खूंणि बोलि।

माहरा न बतै बल अजय सिंघल न डांडा लखौंड मा सिद्धार्थ पैरामेडिकल कॉलेज न नगर निगम देरादूण क 6 बीघा जमीन कब्जा करणा क शिकैत नगर आयुक्त से बि कै छायीं। उन्न बोलि कि सिंघल खळाखळ जमीन कब्जा करणा बात ब्वना छन पर सरकार अर नगर निगम कुछ बि सुणणा खूंणि त्यार नीं च। उन्न बोलि कि जब सिंघला न सूचना अधिकार मा सूचना मांगी त 3 बीघा पर कब्जा क बात बोलि अर कब्जा हटौंणा खूंणि क्वीं कारवै नीं कै।

करन माहरा न बोलि भाजपा जनता पार्टी अर ऊंकु मेयर क देखरेख मा जमीन फर कब्जा करणा क काम देरादूण मा हूंणा छन। उन्न बोलि कि जब भाजपा पार्षद क क्वीं नीं सूणण च त आम मनखि क बात कु सूणळ?

माहरा न बोलि कि हरद्वार कु मामला जख उदासीन अखाड़ा न भाजपा विधायक मदन कोशिक फर उदासीन अखाड़ा क जमीन मा कब्जा करणा कु आरोप लग्यें। करन माहरा न बोलि कि सरकार हाईकोर्ट क सिटिंग जज क अध्यक्षता मा ए कमेटी बण्यें क यांक जांच करण चैंद अर दूदा कु दूद अर पाणि कु पाणि साफ करण चैंद।