मुख्यमंत्री धामीन कांगुड़ा नागराज मंदिर पुनर्स्थापना जागरणम ल्यायी भाग

देरादूण। मुख्यमंत्री धामी न आज टिरी क कांगुड़ा नागराज मंदिर म पौंछिकि श्री कांगुड़ा नागराज मंदिर जागरणम भाग ल्यायी। एक मौका पर उन्न मंदिरम पूजा कायी अर कांगुड़ा नागराज से सर्या प्रदेसा रैवासी सुख सन्ति रैंया या कामना कायी।

ऐ मौका फर मुख्यमंत्री न मंदिरम एक डाळु अपणि ब्वे क नौं कु लगै। मुख्यमंत्री न भगवान कांगुडा नागराज क प्राण प्रतिष्ठा क बधै द्यायी अर सर्या प्रदेसा राजी खुसी रैंया या कामना कायी अर बोलि कि यीं पावन धरति पर दुसर बार औंण कु सौभाग्य मिलि।

मुख्यमंत्री न बोलि कि कांगुड़ा तैं पर्यटन अर धार्मिक रुपम विकसित करै जालु। यां खुणि जिला प्रशासन न 2 करोड़ा डीपीआर तैं जल्दी मंजूरि दिये जाली अर तोक कु विकास खुणि मास्टर प्लान बण्यें जालु।

मंदिरम गेस्ट हाउस 30 हजार लीटरा क्षमता कु पाणि कु टैंक अर मंदिरा बाटौं मा टीन शेड लगै जालु।

मुख्यमंत्री न बोलि की प्रदेस सरकार देवभूमि क धार्मिक अर सांस्कृतिक विकास तैं नै ऊंचै पर लिजाणा खुणि काम करणि च। उन्न बोलि केन्द्र अर प्रदेस सरकार लोगु क भलै खुणि कै योजना चलौंणि च। उज्ज्वला योजना, किसान सम्मान निधि योजना, जनधन योजना अर लखपति दीदी जन्नि योजना प्रदेसा कूण म रैंण वला मनखि तक पौंछिणि छन।

मुख्यमंत्री न बोलि कि 2025 तक डेढ़ लाख बैंणियों तैं लखपति बणौंणा कु लक्ष्य च। प्रदेस सरकार प्रदेसा तैं सर्या देसम अग्वानया प्रदेस बणौंणा खुणि काम करणि च। डबल इंजना सरकारन धनोल्टी तोक कु विकास खुणि वित्तीय मंजूरि दे।

ऐ मौका फर क्षेत्रा रैवासियों न मुख्यमंत्री तैं तोका विकासा बारम मांग पत्र द्यायी। जै पर मुख्यमंत्री न कारवै करणकि बात बोलि।
मुख्यमंत्री न बतै कि छाम-बल्डोगी झूळा पुळ बणौंणाक मांग ह्वे। उन्न बोलि क छाम-बल्डोगी झूळा पुळ बणौंणा खुणि रिपोर्ट त्यार करणा खुणि ब्वलें ग्यायी।

कार्यक्रम म धनौल्टी विधायक प्रीतम सिंह पंवार न बोलि कि धामीक नेतृत्व मा प्रदेस कु सबि तोकुम खुब विकास हूंणू च। राज्य आंदोलनकारियों खुणि 10 प्रतिशत क्षैतिज आरक्षण, सरकरि नौकरिम पारदर्शिता, कटकुटु नकल विरोधि कानून बणै ग्यायी।

ऐ मौका फर विधायक राजपुर खजान दास, मंदिर समिति अध्यक्ष दिलबर सिंह रावत, जिलाधिकारी टिहरी मयूर दीक्षित एस.एस.पी. नवनीत सिंह भुल्लर बि छायीं।