जोशीमठ, राज्य सरकारन तरफौं बटि विस्थापन खूंणि अबि तक 207 कुटुम्दरि थैं 3.10 करोड़ रुप्यौं क मदत कर्यें ग्यें: आपदा सचिव

देरादूण। सचिव आपदा प्रबन्धन डाॅ. रंजीत कुमार सिन्हा न आज मंगळबार खूंणि जोशीमठ मा भ्वां धसणि जमीन क बाद राज्य सरकार क कर्यां राहत अर बचैंव क कामु क बारा मा मीडिया तैं बतै अर बोलि कि राज्य सरकारन तरफौं बटि विस्थापन खूंणि अबि 207 कुटुम्दरि थैं 3.10 करोड़ रुप्यौं क मदत कर्यें ग्यें। उन्न बोलि तसल्लि बात या च कि जोशीमठ मा निकळण वळु पाणि 6 जनवरी खूंणि 540 एल.पी.एम. छायीं, जु अबि घटिक 123 एल.पी.एम. ह्वैग्यें।

सचिव आपदा प्रबन्धन न जानकारि दे कि भारत सरकारन केन्द्र क तकनीकी संस्थानु तैं जोशीमठ क आपदा क तोक कु अध्ययन कैकि जांच रिपोर्ट त्यार करणा खूंणि बगत तय कर्यूं च। सीबीआरआई क 10 बैज्ञानिक क टोळा तैं तीन हफता मा, एनजीआरआई क 10 बैज्ञानिक क टोळा त पैळि रिपोर्ट द्वीय हफता मा अर सर्या रिपोर्ट तिन हफता मा, वाडिया संस्थान क 07 बैज्ञानिकों क टोळा तैं पैळि रिपोर्ट द्वी हफता मा अर पूरि रिपोर्ट द्वी मैना मा, जीएसआई क सात बैज्ञानिकों क टोळा तैं पैळि रिपोर्ट द्वी हफता मा अर पूरि रिपोर्ट द्वी मैना मा, सीजीडब्ल्यूबी क 04 बैज्ञानिकों क टोळा तैं पैळि रिपोर्ट एक हफता मा अर पूरि रिपोर्ट तीन हफता मा अर आईआईआरएस तैं एक हफता मा पैळि रिपोर्ट अर तिन मैना मा पूरि रिपोर्ट देंणा क निर्देश दियें ग्यीं।

सचिव आपदा प्रबन्धन न जाणकारि दें कि राहत शिबिरू मा जोशीमठ मा कुल 615 कमरा छन जौमा 2190 मनखियों रै सकदिन। पीपल कोटी मा 419 कमरा छन जौमा 2205 मनखियों रै सकदिन।
उन्न बोलि कि अबि तक 849 मकानु मा तिड़वाळ प्वड़ि छन अर औरि मकानु कु सर्वे कु काम हूंणि च। उन्न बतै कि गांधीनगर मा 01, सिंहधार मा 02, मनोहरबाग मा 05, सुनील मा 07 वार्ड रैंण लैक नी छन। 250 कुटुम्दरि तैं विस्थापित कर्यें ग्यें अर विस्थापित कुटुम्दरि मा मनखियों क संख्या 838 च।