जनतै क हार . . . .

उत्तराखण्ड मा भाजपा क हत्थु मा अब हरिद्वार जिला पंचैत क कुर्सी ऐग्यें। जिला पंचायत मा 44 सीट छन जैमा 14 भाजपा ने जीति जैका बाद भाजपा न जोड़- तोड़िक कैकि बड़ि जीत हासिल कै याली। चुनौं क जन्नि परिणाम ऐ उन्न नै नै जित्या निर्दलीयु न भाजपा क पुछिड़ि पकड़ि दे। इन्न मा भाजपा क अब 31 सीट ह्वैग्यीं अर हरिद्वार पंचायत मा अध्यक्षा बणौंणा खुंणि 23 सदस्य चैंदन। जै कारण भाजपा खुब दमकणि च। भाजपा प्रदेस अध्यक्ष हर हरिद्वार क सांसद क मुखड़ि मा चलक्वार हि चलक्वार च। चलक्वार इल्ले भि च बल उत्तराखण्ड राज्य बणणा क बाद हरिद्वार मा पैळि बार भाजपा जिला पंचायत क कुर्सी मा बैट्णि च। भाजपा बहुमत क गिनती से अगनै चलिग्यें।

हरद्वार सासंद निशंक त इतगा चलकणा छन कि ब्वना छन कि हरिद्वार मा भाजपा क या ऐतिहासिक जीत च अर सबि मनखियों न सबि अनुसूचित जाति, जन जाति, धर्माक लोगुन भाजपा थैं बोट द्यायी। भापजा क काम से प्रदेस क रैवासी खुश छन अर भाजपा थैं बोट देंणा छन। डॉकटर साब क मुखड़ि मा इतगा चलक्वार च कि ऊं बिना स्वच्या कुढंग अर मसखरा जन बयान देंणा छन।

हां या बात सै च कि भाजपा थैं 14 सीट मिलि अर कांग्रेस सिरफ 5 सीटु मा हि रैग्यें। यां सै जादा यु भि सच च कि हरिद्वार क जनता न राष्ट्रीय दल भाजपा अर कांग्रेस पर भरोसु नि कायी उन्न निर्दलीय फर जादा भरोसु कायी। हाँ खतम जनता क निखणि त तबि ह्वैग्यंे जब जितयां सबि निर्दलियों ध्वका दे, अर भाजपा पुछड़ि पकड़ि दे।

हां या बात सै च भाजपा बहुमत बणौंण मा सफल ह्वैग्यें पर कैनकैकि या बात भाजपा थैं अपणु ज्यूं क भितर आंखा खोलिक दय्खण चैंद, अर विचार करण चैंद कि राजनीति मा क्या सिरफ अर सिरफ कुर्सी हि लक्ष्य हूंण चैंद? क्या यु हि लोकतंत्र च? भाजपा क विचारधारा से दूर दूर तक जौ कु क्वीं रिसता भि नीं च ऊथैं भि सिरफ संख्या बणौंण खूंणि अपणि पार्टी मा सामिल कन्नी च। इन्न हरिद्वार पंचैत चुनौं मा जै थैं भाजपा अपणि जीत मनणि च वा भाजपा क जीत त कतै नि च, हां या हरद्वारक जनतै क हार जरुर च।