कमै से जादा दौलता मामलम गणेश जोशीन बोलि, मिन मुख्यमंत्री तैं सर्या जाणकारी दे याली, यांकु फैदा मितैं हि होलु

देरादूण। कमै से जादा दौलता मामलम सवालु म घिर्यां कैबिनेट मंत्री न बोलि कि मिन अपणु सर्या जाणकारी मुख्यमंत्री धामी तैं दे याली अर यांकु मितैं बड़ु फैदा होलु।

गणेश जोशी न बोलि कि जु बि आरोप मि पर लगदन, वां से मितैं हि फैदा हूंद। उन्न बोलि 2016 म उबरिक हरीश रावत सरकारन मितैं शक्तिमान प्रकरण म फंसे छायीं यांकु फैदा यु ह्वे कि मेरि नौनि राष्ट्रीय नेता बणिग्ये। उन्न बोलि मेरि नौनि सड़क्यिों म नी आंदि त वींतैं क्वीं नी पछ्यणदु।

गणेश जोशीन बोलि कि अब मि पर कमै से जादा जैदाद कु आरोप लगणु च, जैमा मेरि नौनि अर जवैंई की जैदाद तैं बि ज्वड़े जाणु च। उन्न बोलि मेरि नौनि अर म्येरु जवैंई अलग रैंदन अर म्यार जवैंई की तनखा बौत च। कैबिनेट मंत्री न बोलि कि मि पर आरोप लगौंन्दा त ठीक-ठाक लगौंन्दा। उन्न बोलि कि मिन यांकी सर्या जाणकारी मुख्यमंत्री तैं दे याली, यांकु मिथैं बडु फैदा हूंण वलु च।