9 साळु मा देसा विकासा खूंणि सबि तोक मा खुब काम ह्वैन : मुख्यमंत्री
देरादूण। पिछळ 9 सालुु मा देसा विकास खूंणि सबि तोकु खूब काम ह्वैन। 9 साळु मा 4 करोड़ से जादा मनखियौं तैं पक्का घार मिलिन। भारता क इतिहास मा गरीबु खूंणि मकान बणौंणा मा इन्न क्रान्ति पैळि कबि नीं ह्वै। या बात महाजनसम्पर्क अभियान क तहत उर्यूं कार्यक्रम लाभार्थी सम्मेलन कार्यक्रम मा प्रदेसा मुख्यमंत्री न बोलि।
मुख्यमंत्री न बोलि कि साल 2014 मा देस क जनता न नरेन्द्र मोदी फर अपडु भरोसु जतै। आज जनता क ऐ भरोसु न 2014 बटि 2023 तक नौ साळु मा देस क ‘जस रूपी’ रेल गाड़ि तैं विकास रुपी पटरियौं पर तेजी से दौणाणा कु काम ह्वै
यु 9 साळु मा मोदी क राज मा चलणि केन्द्र सरकार न स्वास्थ, शिक्षा अर मुफत मा खाणु , गरीबु तैं घार, फौज कु आधुनिकीकरण अर सबि देसा रैवासियौं तैं वैक्सीन, मोबैल बणौंणा क क्षेत्र मा बौत काम ह्वैन। पैलि भारत तैं दवै अर टीकौं फर दुसर देस फर टिक्यूं रैंण प्वड़दु छायीं। कोरोना काल मा मोदी सरकार न द्वी टीका हि नी बण्यें बल दुन्या क देसु तैं टीका बि भज्यींन। केन्द्र सरकारन 80 करोड़ ळोगु तैं खाद्य सुरक्षा दिंणा कु ऐतिहासिक काम कायी।
मुख्यमंत्री न बोलि कि प्रधानमंत्री क सोच कु नतिजा च कि देस मा करीब 50 करोड़ जनधन खाता गरीबु का ख्वलें ग्यींन। नौ करोड़ से जादा उज्ज्वला गैस कनेक्शन दियें ग्यींन। धारा 370 खतम कर्यें ग्यायी, अध्योध्या मा भगवान राम कु मंदिर, काशी मा विश्वनाथ कु कॉरिडोर, केदारनाथ धाम अर भगवान बदरीनाथ धाम मा मास्टर प्लान बण्यें की काम हूणूं च।
मुख्यमंत्री बोलि कि आज भारत दुन्या मा पांचौं नम्बर क सबसे बड़ी अर्थ व्यवस्था बणिग्यें।
मुख्यमत्री धामीन बोलि कि प्रधानमंत्री क बत्यां बाटों मा चलिकि उत्तराखण्ड मा विकासा काम खळाखळ हूंणा छन।
प्रदेस सरकार 1 लाख 81 हजार गरीब कुटुम्दरि तैं तीन गैस सिलेण्डर मुफत मा दिंणी च। प्रदेस मा व्यटुळौं खूंणि क्षैतिज आरक्षण कु बन्दबस्त कर्यें ग्यें, समान नागरिक संहिता कु कानून त्यार कर्यें जाणु च। देस कु सबसे बडु नकल विरोधि काननू बणौंणु, राज्य आंदोलनकारियौं तैं आरक्षण देंणु या अबि उच्च शिक्षा मा प्रदेसा विद्यार्थियों तैं छात्रवृत्ति देंणा क फैसळा जन कै काम कर्यें जाणा छन।
कैबिनेट मंत्री जोशी न बोलि दुन्या मा भारत देस तैं नै पछ्याण मिलि। आज सबि देसा रैवासियौं कु सम्मान हूंणू च। समाज मा सबि ळोगु क ध्यान रख्यें की जनकल्याणकारी योजना बण्यें जाणि छन। उन्न बोलि आज देसा मा दूर रैंण वळु मनखि तक सरकारि योजना पाैंछ्णि छन।
ऐ मौका फर सांसद माला राज्यलक्ष्मी शाह, भाजपा के प्रदेश अध्यक्ष महेन्द्र भट्ट, मेयर सुनील उनियाल गामा, भाजपा क महानगर अध्यक्ष सिद्धार्थ अग्रवाल, भाजपा युवा मोर्चा क राष्ट्रीय उपाध्यक्ष नेहा जोशी छायीं।