जै घार म किरायेदार छन , ऊं घार मा यूपीसीएल देंण चु जोर कु झटका

देरादूण। घार मा द्वी से जादा किरायेदार छन अर बिजली कनेक्शन घर्या च त अब वु लोगु तैं जोरा झटाक लगण वलु च। अब जै घौरु म किरायदार छन अर वख बिजली कु कनेक्शन घर्या च, वै बिजली कनेक्शन तैं अब बदलि कै कि कॉमर्शियल कर्ये जालु।

उत्तराखण्ड पॉवर कारपोरेशन लिमिटेड (यूपीसीएल) न छापा मरण सुरु कै याली।

यूपीसीएल तैं देरादूणा क्लेमेन्टाउन, प्रेमनगर, बिधौली, पौंधा, भाऊवाला, सेलाकुई म घर्या बिजली कनेक्शन कु गलत उपयोग करणा शिकैत मिलणि छन।

यूपीसीएला नजर औद्योगिक व शैक्षणिक तोक म जादा च। क्वीं इन्नु मकान जख मालिक नीं रैन्दु अर द्वी से जादा किरायेदार छन यूपीसीएल न कारवै सुरू कै याली। यूपीसीएला छापेमारी म जै घार मा घर्या बिजली कनेक्शन कु कॉमर्शियल उपयोग हूंद त उबरि हि डांड (जुर्माना) लग्यें जालु।

यूपीसीएल न सेलाकुई मा 200 से जादा बिजली कनेक्शन फर कॉमशियल उपयोग पकड़ि अर वु सबि घर्या कनेक्शनु तैं कॉमर्शियल कनेक्शन मा बदलि कै याली। यख एक घौर मा द्वी किलोवाट कु घर्या बिजली कनेक्शन छायीं जै फर 32 किरायेदार रैंणा छायीं। इन्नि सिकैत सबसे जादा देरादूण क मोहनपुर डिवीजन मा जादा समणि आणि छन।

यूपीसीएल न हरद्वार, खटीमा, काशीपुर, रुद्रपुर, बाजपुर, सितारगंज म औद्योगिक क्षेत्रु म कारवै क तय्यरि सुरु कै याली।