कांवड़ जातरा बाटु मा होटळु अर ढाबा मालिकौं तैं फूड लैसेंस अर पछ्याण पत्र रखण का आदेश

उत्तराखण्ड सरकारन कांवड़ जातरा म होटळु अर ढाबा मालिकौं तैं फूड लैसेंस अर पछ्याण पत्र धरणा कु आदेश जारी कायी।

सरकारन साफ कायी कि कांवड जातरा म कांवड़ पटरी पर दुकान लगौंण वला दुकानदार तैं दुकनिम दुकान लचौंणा कु लैसेंस अर अपणु पछ्याण पतर धरण प्वाडलु।

बतै दियां क पिछल साल बि सरकारन इन्न फैसला लै छायीं पर तबि कोर्टा आदेश बाद सरकार तैं अपणु फैसला वापिस लिंण पोड़ि।

यांका बाद बि ऐसु कांवड़जातरा म सरकारन इन्नि फैसला लियाली। मुख्यमंत्रिन बोलि कि 11 जुलै बिटि सुरु हूंणि कांवड़ जातरा म ऐसु चार करोड से जादा भक्तु का औंणा उमेद च।
मुख्यमंत्रिन बोलि कुछ मैना पैलि उत्तराखण्डम थूक जिहाद जन्नि घटना खुब बढ़िन इल्लै सरकारन यु फैसला ल्यायी। उन्न बोलि करोड़ो लोग आस्था क दगड़ि कावड़ जातरा म औंदन। इन्न मा ऊंकी आस्था दगड़ि क्वीं खौळ नीं हूंण चैंद। इल्लै प्रदेस सरकारन फैसला ल्यायी कि दुकानदारु तैं अपणि दुकानिक समणि दुकनि कु फूड लैसैंस ल्यखणु जरुरी होलु। अर क्वीं इन्नु नीं करदु त वैंका खिलाप कारवै करे जाली।

कैबिनेट मंत्री गणेश जोरी न सरकारे ऐ फैसला कु स्वागत कायी अर बोलि कि इन्नि कतगै घटना ह्वेग्येन। इल्लै यु फैसला लिये ग्यायी।

गणेश जोशीन बोलि कि मैं गणेश जोशी छौ, मि गणेश खान नीं लेखि सकदू। प्रदेसम पिछल कुछ सालु बिटि इन्नि घटना हूंणि छन जै कारण यु फैसला लिंण पोडि जु बौत जरुरी छायीं।

बतै दियां कि 1 जुलै खुणि जारी ओदशम स्वास्थ्य सचिव डॉ. आर. राजेश कुमार तरफां बिटि ब्वलें ग्यायी कि कांवड़ जातरा रुट पर सबि होटल अर ढाबा, ठेल्ली, फड़ अर हौरि खाण-पेंणा दुकानियों मा दुकानदान तैं अपणु लैसेंस प्रमाण पतरा साफ कौपी अपणि दुकानिम लगाण प्वाड़लि अर छ्वटा दुकानदार ठेल्लि-फड़ वलों तैं अपणु पंजीकरण प्रमाण पतर रखण प्वाड़लु अर मंगण पर दिखाण प्वाड़लु। यांका दगड़ि सबि फूड सेफ्टी बोर्ड पर साफ अर दिख्येण वलि जगा मा लगाण प्वाड़लु। जै से ग्राहक तैं पता हूंण चैंद कि खाण पेंण गुणवत्ता की जिम्मेबरि कैकि च। उन्न बोलि आदेशन तैं नीं मनण वलों पर खाद्य सुरक्षा अधिनियम 2006 की धारा 55 क तहत कारवै करे जाली जैमा 2 लाख रुप्या तक कु दंड ह्वे सकदू।

सकरारै ये फैसला कु दुकानदारुन खुसी जतै अर बोल कि हमतैं क्यी आपत्ति नीं च या मा क्वीं गलत बात नीं च।