हीरो मोटोकाॅर्प न दीं राजस्व विभाग तैं 320 मोटरसैकिल

देरादूण। मुख्यमंत्री धामीन आज अपड़ा घौर मा हीरो मोटोकाॅर्प लिमिटेडन राजस्व विभाग तैं दीं 320 मोटरसैकिल तैं झण्डा दिख्यें।

या मोटरसैकिल पाड़ा क जनपदु खूंणि छन। राजस्व विभागा राजस्व उप निरीक्षकु तैं मोटरसैकिल आपदा मा काम, कानुन बन्दबस्त मा मदत अर घसर पसर (इधर-उधर) जाणा अर झटाझट काम करणा खूंणि ईं दियेंग्यीं।

मुख्यमंत्री धामीन हीरो मोटोकाॅर्प क आभार बोलि अर बोलि कि राजस्व विभागा राजस्व उप निरीक्षकु तैं मोटरसैकिल क सुविधा मिलण से क्षेत्राक रैवासियों क दिकदरि कु झट समाधान अर उप निरीक्षकु तैं तोक मा घसर पसर जाणा मा अर रैवासियों कि दिकदरि तैं हल करणा मा असानी ह्वै जाली।

ऐ मौका फर अपर मुख्य सचिव श्रीमती राधा रतूड़ी, सचिव अर आयुक्त राजस्व चन्द्रेश यादव, हीरो मोटोकॉर्प क सी.एस.आर हेड भारतेन्दु कबी, उप राजस्व आयुक्त मो. नासिर अर सहायक राजस्व आयुक्त के. के. डिमरी छायी।