‘हर्बल वर्ल्ड हिमालय श्री धन्वंतरि धाम’ आयुर्वेद अर प्राकृतिक चिकित्सा कु यु धाम ‘आरोग्य संस्कृति’ की पछ्याण च : मुख्यमंत्री धामी

मुख्यमंत्री धामिन आज मालाग्राम, यमकेश्वर मा उर्यूं पैलु धन्वंतरि महोत्सव मा वर्चुअल भाग ल्यायी।

मुख्यमंत्रिन पैलि सबि तैं ‘पैलु धन्वंतरि महोत्सव’ की बधै द्यायी अर बोलि कि यमकेश्वर का मालाग्राम मा बण्यूं ‘हर्बल वर्ल्ड हिमालय श्री धन्वंतरि धाम’ आयुर्वेद अर प्राकृतिक चिकित्सा सर्या दुन्या मा एक हि समग्र केन्द्र च।

मुख्यमंत्रिन बोलि यु धाम भारत देसा कु ‘आरोग्य संस्कृति’ की पछ्याण च जख हमरा ऋषि-मुनि कु बण्यूं स्वास्थ्य सिद्धांतौं का दगड़ा-दगड़ि वनस्पति विज्ञान पर बणि 9 चिकित्सा पद्धति अर दुन्या की लगभग 964 चिकित्सा विधाओं कु मेल दय्खण कु मिललु।

मुख्यमंत्रिन बोलिकि प्रदेस प्रदेसम 300 से जादा आयुष आरोग्य केन्द्र चलणा छन। प्रदेसा हरेक जिलम 50 अर 10 बिस्तरा वला आयुष अस्पताल बि बण्यें जाणा छन। प्रदेसम आयुष नीति तैं लागू कैकि औषधि बणौंणा, वेलनेस, शिक्षा, शोध अर दवै का डाळों कु उत्पाद अर ऊतैं बणौंण वास्ता बि काम करे जाणु च।

मुख्यमंत्रिन बोलि कि प्रदेस सरकार औंण वला सालम आयुष टेली-कंसल्टेशन सेवा बि सुरु करणा दगड़ि 50 नै योग अर वेलनेस केन्द्र ख्वलणा दिसा मा काम करणि च। प्रदेसम योग, ध्यान अर प्राकृतिक चिकित्सा तोकम शोध तैं अगनै बढ़ौंणा वास्ता 10 लाख रुप्यौं कु मदत बि करणि च। प्रदेसम आयुर्वेदिक अर प्राकृतिक चिकित्सा,योग अर आध्यात्मिक पर्यटन तैं बढ़ाैंंणा वास्ता गढ़वाल अर कुमौ मंडल मा एक-एक स्पिरिचअल इकोनॉमिक जोन बणाणि च।