हरीश रावतन बोलि तीरथ सिंह रावत क पिड़ा सब्यौं क पिड़ा च, यख त चौकीदार ही चिल्लाणु चोर-चोर

देरादूण। तीरथ सिंह रावतन विभागु मा मत्थी बटि हूंण वलि कमै (कमीशन) क बारा क्या बोलि कि कांग्रेस लगातार हमला वार ह्वै ग्यायी। तीरथ सिंह रावतन ब्याली बोलि छायीं कि हमरि निखणि च कि कै भि विभाग मा बिना कुछ लियां-दियां कुछ भि काम नीं हुंदू। तीरथ सिंह रावत क ईं पिड़ा फर अब पैल्यक मुख्यमंत्री हरीश रावतन भि हमला कै दें उन्न बोलि कि तीरथ सिंह रावतन न अपणि हि न सब्यौं क पिड़ा बतै। उन्न बोलि तीरथ सिंह रावत सच बोलि अर मि ऊंक दगड़ मा छौं। हरीश रावतन भाजपा पर सवाल उठै अर बोलि कि प्रदेसाक सबि रैवासी ईं पिड़ा मा छन पर क्या कन अर कैकि तरफ दय्खण।

हरीश बोलि कि यख त चौकीदार ही चोर-चोर चिल्लाणु च, इन्न मा चोरि करण वळा चोर से कु बचाळु। उन्न बोलि कि यख त सरकार क ळोग हि घूस क बात करणा छन इन्न मा आम मनिखियों थैं घूस लिंण स कु बचाळु।

हरीश रावतन बोलि कि सरकार क्वीं भि अर कैकि भि रै ह्वैळी भाजपा सरकार थैं घेस लिंण वळा थैं ख्वजण चैंद। उन्न सवाल खड़ा करि कि भाजपान 6 सालु मा आखिर क्या कै? हरीश रावतन बोलि कि अबि सरकार थैं साढ़े चार साल कु बगत औरि च। इन्न मा सरकार हत्थु थैं कु रवक्णु च। उन्न बोलि कि सरकार क हत्थ कमजोर छन त हम मालिस कै द्युळा।

उन्न बोलि कि मि इन्न समझदु कि यां से राज्य क रैवासियों क मनोबल न गिरण चैंद।

बतै दियां कि तीरथ सिंह रावतन बोलि छायीं कि उत्तराखण्ड बणणा क बाद हमथैं घूस थैं बन्द करणु छायीं पर हमन ठीक उत्तरप्रदेस क बगत जख 20 प्रतिशत घूस लियें जान्दि छायीं, उत्तराखण्ड न वखि बटि सुरू कायीं, यु बौत खराब ह्वै।
उन्न बोलि कि यु म्यारू प्रदेस च, यु मेरि कुटुम्बदरि च जब तक यु ज्यूं मा नीं आळु तब तक कुछ नीं ह्वै सकदू।

उन्न बोलि ऐ बारा मा नेतों थैं स्वचण प्वाड़ळु। उन्न बोलि हम अधिकारियों थैं सजा देदिन्दु अर यांक पिछनै जु नेता छन वु बची जन्दिन। जबकि दोषि त द्विया छन।