हमरू लक्ष्य प्रदेस बटि 2024 तक टीबी थैं भगौंणा कु च : मुख्यमंत्री धामी
हमथैं टीबी उन्मूलन अभियान मा सामिल ह्वैकि टीबी क मरीजुक मदतकु सौं लिंण प्वाड़ळि। या बात आज राजभवन मा राज्यपाल गुरमीत सिंह न बोलि।
राज्यपाल अर मुख्यमंत्री पुष्कर सिंह धामी न आज राजभवन मा प्रधानमंत्री टीबी मुक्त भारत अभियान क सुरुआत कायी।
ऐ मौका फर राज्यपाल न टीबी क बिमारू क मदद खूंणि निःक्षय दगड़यां बण्यें कि 21 बिमारू थैं गोद ल्यें अर ऊथैं मैना मा मिलण वळि पोषण किट दे।
राज्यपालन ऐ मौका फर प्रदेस क मनखियों क दगड़ा दगड़ि जनप्रतिधियों अर गैर सरकारि संगठनु से निःक्षय मित्र बणौंणा क विनीत कायी।
कार्यक्रम मा मुख्यमंत्री पुष्कर सिंह धामी न बोलि हमरू लक्ष्य प्रदेस बटि 2024 तक टीबी थैं भगौंणा कु च। मुख्यमंत्री न प्रधानमंत्री मोदीक लम्बी उमर क भगवान से अरज कायी अर ब्वाल मोदी जी दिख्यां बाटों भारत विश्व गुरू बणिक सर्या दुन्या थैं बाटु दिखाणा कु काम कराळु। उन्न बोलि एक भारत श्रेष्ठ भारत कु सुपिन थैं पूरू करणा खूंणि उत्तराखण्ड खुब जिकुड़ि लग्यें कि काम करणु च।
ऐ मौका फर कैबिनेट मंत्री डॉ. धन सिंह रावत, गणेश जोशी, सांसद माला राजलक्ष्मी शाह, मेयर सुनील उनियाल गामा, विधायक खजान दास, विधायक श्रीमती सविता कपूर, बृजभूषण गैरोला अर स्वास्थ्य विभाग अफसर मौजूद छायीं।