हमरि निखणि (दुर्भाग्य) च कि कै भि विभाग मा बिना घूस लियां कुछ भि काम नीं हुंदू : तीरथ सिंह रावत

देरादूण।। सदनि छ्वीं मा रैंण वला पैल्यक मुख्यमंत्री तीरथ सिंह रावत न एकदा दुबरा इन्नु बयान दे द्यायी जै से प्रदेस राजनीति मा एकदा दुबरा ताति ह्वैग्यें। तीरथ सिंह रावतन विभागु मा मत्थी बटि हूंण वलि कमै (कमीशन) क बारा मा बोलि। उन्न बोलि बल या हमरि निखणि च कि कै भि विभाग मा बिना कुछ लियां-दियां कुछ भि काम नीं हुंदू।

तीरथ सिंह रावता क ऐ बयाना न प्रदेस क सियासत मा भ्यूंच्लु ऐग्यें अर कांग्रेस सरकार फर हमलाबार ह्वैग्यें।

ह्वै इन्नु च कि तीरथ सिंह रावतन बोलि कि कै भि विभागा मा बिना घूस दियां कुछ भि काम नीं हूंदू। उन्न बोलि कि या बात मिन मुख्यमंत्री रैंद भि बोलि छायीं। उन्न बोलि कि मिथैंं ब्वन मा जरा भि डैर नीं लगदि। उन्न बोलि कि उत्तरप्रदेस बटि अलग हूंणा क बाद हमथैं घूस लिंणु छ्वोड़ि दिंणु छायीं। वै बगत उत्तरप्रदेश मा 20 प्रतिशत घूस लियें जान्दि छायीं। तब जल निगम, जल संस्थान, पीडब्ल्यूडी विभाग मा घूस क बात सूणदा छायीं।

उन्न बोलि कि उत्तराखण्ड बणणा क बाद हमथैं घूस थैं बन्द करणु छायीं पर हमन ठीक उत्तरप्रदेस क बगत जख 20 प्रतिशत घूस लियें जान्दि छायीं, उत्तराखण्ड न वखि बटि सुरू कायीं, यु बौत खराब ह्वै।
उन्न बोलि कि यु म्यारू प्रदेस च, यु मेरि कुटुम्बदरि च जब तक यु ज्यूं मा नीं आळु तब तक कुछ नीं ह्वै सकदू।

उन्न बोलि ऐ बारा मा नेतों थैं स्वचण प्वाड़ळु। उन्न बोलि हम अधिकारियों थैं सजा देदिन्दु अर यांक पिछनै जु नेता छन वु बची जन्दिन। जबकि दोषि त द्विया छन।