हैली टिकट क नौ पर जात्रियों थै ठगोंण वला पांच मनखि थैं पुलिस न पकड़ि

केदारनाथ धाम मा हैली सेवा क नौ पर वेबसाइट बण्यें कि कमै करणा छन। ऐ बारा मा रूद्रप्रयाग पुलिस न पांच मनखियों थैं पकड़ि याली।

बतै दियां कि अबि केदानाथ धाम मा पौंचणा कु पैदल रस्ता 18 किलोमीटर लम्बु च। त दूसर तरफ हवै सेवा च, जै से केदारनाथ धाम मा झट स पौंच्यें जै सकदन। यां कू फैदा उठै कि कुछ मनखियों अपड़ा घार मा हि बैट्ठि कि जात्रियों थैं ठगौंणा छन अर फर्जी वेबसाइट बण्यें कि भैर बटि आणा वला जात्रि थैं बुकिंगक नौ पर पैसा कमाणा छन। जब जात्रि पर यख आंद अर जब ऊथैं हवै सेवा कु टिकट नि मिलदु तब वैथैं पता चल्दू कि वू ठग्यें ग्यीं।

जनपद रूद्रप्रयाग पुलिस न केदारधाम मा हवै सेवा क नौ पर ठगोंणा वला मामला मा 5 मामला दर्ज कर्या छन। चार मामला मा पुलिस न करवै कायी अर मामला एसआईटी मा च। पुलिस अधीक्षक आयुष अग्रवाल न बतै कि केदारनाथ जात्रा मा हेली सेवा क नौ पर कै भि फर्जी वेबसाइट अर एजेन्ट के बखौंण मा न अयां। उन्न बतै बल उत्तराखण्ड राज्य मा चारधाम जात्रा क हवै सेवा खूंणि गढ़वाल मण्डल विकास निगम थैं अधिकृत करयूं च। गढ़वाल मण्डल क विकास निगम के वेबसाइट पर हि टिकट बुकिंग कर्यां। उन्न बोलि कि कै भि कीमत पर जात्रियों थैं लुटण वलों थैं छ्वडै़ नि जालु।