हद च चम्चागिरी कि . . .

UK Dinmaan

‘हरे राम हरे कृष्ण’ पिक्चर मा एक गाणा छाई कि ‘राम का नाम बदनाम न करो’। राम नामकू गमछा कंधा मा, अर चरस गांजा का दम लगान्दा हिप्पियों थैं देव आन्नद समझाणु छाई कि – भगवान राम हमरि सम्भयता का प्रतीक छन, तुम उंकु नौ बदनाम ना करो। लेकिन अजकाळ त उत्तराखण्ड की राजनीति मा सत्ता सुख पाणा खुड़ि राम नौ दगड़ राम भक्त हनुमान कू नौ भी बदनाम करैंं जाणु च।

यख सत्ता सुख पाणा खुड़ि द्ब्तौं का नौ पर सिरफ चम्चागिरी हुंणि च और कुछ भि ना। यख गरमी का मैंना की गरम कम अर मोदी आरती, सुबोध आरतीळ सियासी गरमी की आग ज्यादा च लगि। अर ईं आग मा गणेश जोशी धींयू डाळणकुु काम करणा छना। गणेश जोशीळ त चम्चागिरी की सभि लकीर थैं पार कैरि द्याई। प्रधानमंत्री पर उंकू विश्वास त स्वाभाविक च, अर प्रधानमंत्री पर विश्वास त प्रत्येक देशवासी थैं हुंण चैंद। लेकिन आस्था का नाम पर गणेश जोशी की सुबेर-सुबेर मोदी जी की पूजा अर अपणा बुबा की याद मा बढ़ायू मन्दिर मा मोदी की मूर्ति लगाण की बात मा सवाल त उठळा ही। क्या यू द्यब्तों कू अपमान नि च?

गणेश जोशीळ सार्वजनिक मंच मा मोदी जी की आरती कैरिक अपड़ा द्यब्तों कू अपमान ही कना छन। गणेश जोशीळ मोदी जी की आरती कैरिकि सिद्ध कैरि याळी कि उथैं न त अपणा कर्म पर विश्वास च अर न ही अपणा द्यब्तों पर। ऊथैं बस मोदी कि चम्चागिरी कैरिकि कुछ पाणा कि लालसा मात्र च।

गणेश जोशी खुणि मोदी जी अब तक का सबसे अच्छा प्रधानमंत्री ह्वै सकदन। सार्वजनिक मंचों बटि उंकू चम्चागिरी करणू कू गणेश जोशी कू नैतिक अधिकारी ह्वै सकद, पर द्यब्तों दगड़ छळ कपट कू अधिकारी गणेश जोशी थैं कैल द्याई। हिन्दू धर्म मा जिन्दा मनखि की पूजा अर उैंका नौं कू चालीसा पाठ नि हुन्दु।

सुबेर-सुबेर मोदी जी की पूजा अर मन्दिर मा मोदी की मूर्ति लगाण कि बात करण वाला जोशी जी मोदी कू अपमान ही नि करणा छन बल्कि अपणा द्यब्तौं दगड़ भि छल कपट कना छन।

त जोशी जी मोदी जी से कुछ पाणा कि ळाळसा मा अपणा ब्वे-बाबा से पैलि ऊंका खूटों मा मुुंड जरूरी टिकावा पर अपणा द्यब्तौं का नाम बदनाम न कारा। अपणा द्यब्तों तैं खुश राखा- वो तुमरि उन्नति कारला। अपणा द्यब्तौं का भजन कारा वो तुमरि मनोकामना पूरी कारला, न कि मोदी जी!