राज्यपाल अर मुख्यमंत्री धामीन शहीद कैप्टन दीपक सिंह तैं द्यायी श्रद्धांजलि
देरादूण। डोडा जम्मू कश्मीर मा आतंकवादियों क हमला मा शहीद हूयां 48 राष्ट्रीय रैफल का कैप्टन दीपक सिंह कु पार्थिव शरैल जौलीग्रांट पौंछि। जख राज्यपाल लेफ्टिनेंट जनरल गुरमीत सिंह अर मुख्यमंत्री धामीन कैप्टन दीपक सिंह क पार्थिव शरैल पर फुळ अर्पित करिन। उन्न भगवान से पुण्यात्मा तैं अपणा खुटौं म जगा दंेणा की अर ऊंकी कुटुम्दरि तैं पिड़ा सैंणा क तागत देंणा कामना कायी।
ऐ मौका पर राज्यपाल लेफ्टिनेंट जनरल गुरमीत सिंह अर मुख्यमंत्री धामीन शहीदा बुबा से मुखाभेंट कायी अर ऊतैं हिकमत द्यायी अर बोलि प्रदेस सरकार बिटि हरेक तरौं क मदद कु भरोसु द्यायी।
राज्यपाल न बोलि शहीद कैप्टन दीपक सिंह वीरभूमि उत्तराखण्डा गौरव छन। मां भारती क सेवा म उंकु यु बलिदान ज्वानु म राष्ट्रभक्ति कु संचार पैदा करालु। देस क रक्षा म वीर कैप्टन दीपक कु बलिदान सुद्दि नी जालु। यीं पिड़ाक बगत सर्या देस शहीदक कुटुम्दरि क दगड़ि च।
मुख्यमंत्री न बोलि कि शहीद कैप्टन दीपक सिंह न देस खुणि अपणु सबसे बडु बलिदान द्यायी ऊंकु यु बलिदान सुद्दि नी जालु। उन्न बोलि वीर ज्वानु क शहादत अर ऊंकी बहादुरी से ही हमरु देस सुरक्षित च। उन्न बोलि कि सर्या देस शहीद की कुटुम्दरि तक खडु च। उन्न बोलि कि प्रदेस सरकार शहीद क कुटुम्दरि क हरेक तरौं मदद कराली।
ऐ मौका पर विधायक बृजभूषण गैरोला, लेफ्टिनेंट जनरल संदीप जैन, कमान्डेंट, भारतीय सैन्य अकादमी, मेजर जनरल आर. प्रेम राज, जीओसी उत्तराखण्ड सब एरिया बि छायीं।