भराणीसैंण मा सरकार थैं दुबरा लगि जड्डु : हरीश रावत

गैरसैंण। भराणीसैंण मा बजट बगत से पैळि खतम करण पर कांग्रेस क बड़ा नेता अर पैल्यक मुख्यमंत्री हरीश रावतन सरकार कु ठट्ठा (तंज) लग्यें अर बोलि कि भराड़ीसैंण मा सरकार थैं जड्डु लगि ग्यें।

हरीश रावतन सोशल मीडिया मा लेखिकि सरकार थैं भराड़ीसैंण मा जड्डु लगिग्यें। चार दिन मा हि अपड़ु लंटर-पंटर अर डिसाण बांधिक देरादूण मा वापिस ऐग्यें।

हरीश रावतन लेखि कि या कनि रुड़ियों क राजधानी च? जख सरकार द्वी दिन बजट मा चर्चा करौंणा क हिकमत बि नी जुट्यें साकी।

हरीश रावतन लेखिकि अब त हमथैं सक हूंणि च कि पैल्यक मुख्यमंत्री न अपड़ि पार्टी दगड़ सलाह अर विचार कैकि गैरसैंण थैं रुडियों क राजधानी घोषित कै छायीं। उन्नसरकार कु ठट्ठा लग्यें अर लेखि कि आज रुडियों क राजधानी मा न त क्वीं चपरसी च अर न क्वीं बाबु, तुमथैं खुज्याण फर बि नी मिळणु च।