उत्तराखण्ड कु आधारभूत ढांचा तैं औरि कटकुटु करणा खूंणि औद्योगिक निवेश बौत जरूरी च : मुख्यमंत्री धामी

देरादूण। दिसम्बरा मैना मा प्रदेस मा हूंण वलु इस्वेस्टर समिट तैं लेकैकि दिल्ली मा रोड शो उर्यें ग्यायी। ऐ मौका फर मुख्यमंत्री धामीन बोलि बल प्रधानमंत्री मोदी एक साल म 10 लाख लोगु रूजगार देंणा कु लक्ष्य धर्यूं च। मुख्यमंत्री न बोलि हम प्रधानमंत्री कु ऐ सुपिनु तैं साकार करणा खूंणि कोसिस करणा छा।

मुख्यमंत्री न बोेलि कि उत्तराखण्ड तैं बि जी 20 क तीन बैठक उर्यौंणा कु मौका मिलि। प्रधानमंत्री न बोलि पैल्यक प्रधानमंत्री अटल विहारी वाजपेयी न उत्तराखण्ड तैं औद्योगिक पैकेज दियें जाणा से प्रदेसा मा औद्योगिक वातावरण बणि। आज प्रधानमंत्री क बत्याँ बाटा पर प्रदेस मा 1.50 लाख करोड़ रुप्यौं क योजनाऔं पर काम कर्यें जाणु च। मुख्यमंत्री न बोलि आज उत्तराखण्ड पर्यटना तोक मा सर्या दुन्या की सबसे जादा पसंदा जगा बणणि च।

मुख्यमंत्री न बतै अबि तक 44 लाख लोग चारधाम जातरा मा ऐ। कांवड़ जातरा मा ऐसु साल 4.15 करोड शिवभक्त ऐ छायीं अर पिछल साल 3.75 करोड़ लोगु ऐ छायीं।
उन्न बोल हमरि कोसिस प्रदेसा मा औंण वला पर्यटक अर भक्तु तैं अच्छी सुविधा देंण कु च। यां खूंणि सड़क, रेल हवै जातरा पर ध्यान दियें जाणु च।

मुख्यमंत्री न बोलि रूजगार हि ना बल उत्तराखण्ड क आधारभूत ढांचा तैं औरि कटकुटु करणा खूंणि औद्योगिक निवेश बौत जरूरी च। उन्न बोलि ऐ मकसदन हि हमन उत्तराखण्ड मा ‘ग्लोबल इन्वेस्टर्स समिट’ उर्यौंणा कु फैसला कायी। मुख्यमंत्री न बोलि कि ब्रिटेन दौरा मा 400 से जादा उद्योग जगता प्रतिनिधियौं बटि 20 हजार करोड़ से जादा निवेश कु प्रस्ताव मिलिन, वां से या बात साफ हवैग्ये कि देस ही ना बल विदेसा निवेशक बि उत्तराखण्ड मा निवेश करणा खूंणि मतंग (उत्साहित) छन।

ऐ मौका फर सचिव सचिन कुर्वे, डॉ. आर. राजेश कुमार, महानिदेशक सूचना बंशीधर तिवारी बि छायीं।