नौनीं आज कै भि क्षेत्र मा नौनों से कम नि छन : मुख्यमंत्री

मुख्यमंत्री त्रिवेन्द्र सिंह रावतन आज लच्छीवाला वन विश्राम घौर मा आयोजित ‘भारतीय संस्कृति अर ऊंकु महत्व अर ‘बेटी बचाओ बेटी पढ़ाओ’ कार्यक्रम मा भाग ल्यायी।

ऐ मौका पर मुख्यमंत्री न ब्वाळ कि राज्य सरकार महिला सशक्तिकरण खूंणि ळगातार प्रयास करणि च। उन्न ब्वाळ कि आज महिळा स्वयं सहायता समूह , रूरळ ग्रोथ सेन्टर अर महिला मंगळ दल मा हर जगा ब्यटळा अगने छन। उन्न ब्वाळ कि 13 जिळों मा 10 पंचायत मा ब्यटुळों अध्यक्ष छन। ‘बेटी बचाओ बेटी पढ़ाओ’ कार्यक्रम मा उधमसिंह नगर देश क 10 जनपदों मा शामिळ च। उन्न ब्वाळ कि नौनीं आज कै भि क्षेत्र मा नौंनों से कम नि छन।

मुख्यमंत्री न ब्वाळ कि डांडों मा घास एक समस्या च, जै खूंणि हमन मुख्यमंत्री घस्यारी योजना शुरू कैर द्यायी। मुख्यमंत्री घस्यारी योजना ळ ब्यटुळों का मुण्ड बटि घासकु भार कम ह्वै जाळु। उन्न ब्वाळ कि अब ब्ये-बुबा का सम्पति मा नौनी भि बराबर का हकदार ह्वैळी।

कार्यक्रम से पैळि मुख्यमंत्री चमोळी आपदा मा मौर्या ळोगुक आत्मा क शान्ति खूंणि हूंण वळा यज्ञ मा भि शामिळ ह्वै। कार्यक्रम मा मुख्यमंत्री न कोविड-19 क लैड़ मा शामिळ ळोगु थैं सम्मानित कायी।

ऐ मौका फर हरि सेवाश्रम हरिद्वार क महामंडलेश्वर अनन्त श्री विभूषित स्वामी हरिचेतनानन्द जी महाराज, समिति क अध्यक्षा श्रीमती आशा कोठारी, सचिव हरीश कोठारी, रोशन कोठियाळ, राजेश भट्ट विनय कण्डवाळ अर वन विभाग क अधिकारी मौजूद छायी।