‘घाम तापो’ पर्यटन, ‘बारामास’ पर्यटन पर लगला फौंकुड़ा

अबि जादा पूरणि बात नीं च। 12 अक्टूबर 2023 प्रधानमंत्री मोदी पिथौरागढ़ मा अयां छायीं जख उन्न जोलिंगकांग पौंछिकि आदि कैलाशा दर्शन करनि। 19567 फीट ऊंचू ऐ पाड़ तैं छ्वट्टु कैलाशा नौं से जणें जान्द। वे बगत प्रधानमंत्रिन बोलि कि ‘आदि कैलाश क जातरा आध्यात्मिकता अर लोक संस्कृति क बीच गैरु रिस्ता कु ज्यूंदु प्रमाण च।
मोदी की यीं जातरा बाद छ्वट्टु कैलाश तैं सर्या दुन्या म पछ्याण मिलि अर ऐ दूर दराज तोकम देस विदेस बिटि पर्यटक औंण लगिन।

यांका ठीक 17 मैनौं बाद प्रधानमंत्री माँ गंगा कु मैत मुखबा ऐनि। ऊंकु मकसद छायीं देवभूमि म ह्येंद मैना की चारधाम जातरा तैं अगनै बढ़ौंणु। अर याका वास्ता मोदी न अप्फु तैं सीधा जनता दगड़ि जोड़ि अर एक से एक सलाह दींन। उन्न मोदिन बोलि कि जब सर्या ह्यूंद, सर्या देसम कुयेडु़ लग्यूं रैंद अर घाम कखि न दिख्येंदू , तबरि पाडु मा घाम पतण कु मजा कुछ हौरि हूंद। उन्न बोलि यु कुछ साख इवेंट बणि सकदू। उन्न गढ़वाळि म बोलि क्य हम ये तैं ‘घाम तापो’ पर्यटन नीं बोलि सकदा? उन्न बोलि कि उत्तराखण्डम पर्यटना क्षेत्रम बदलाव ल्याणा बौत जरुरत च। अर ये तैं बारमास बणि की रखण चैंद। उत्तराखण्ड म क्वीं बि मौसम ‘ऑफ-सीजन’ न बल सर्या साल पर्यटन ‘ऑन’ हूूंण चैंद।

उत्तराखण्ड तैं लेकैकि प्रधानमंत्री मोदी या ब्रांडिंग कु पिछनै मुख्यमंत्री धामी क कोसिस कैसे लुक्यीं नीं च। मोदी कु आदि कैलाश औंणु या मुखबा औंणु, या का वास्ता मुख्यमंत्री धामी दिल्ली जैकि प्रधानमंत्री तैं यख औंण वास्ता न्यूतौ दे छायीं। धामी की ही या कोसिस च कि अक्टूबर 2023सम मोदिन आदि कैलाश कु प्रचार के छायीं तब कुछ लोगु धामी पर यु आरोप बि लग्ये छायीं कि धामी चारधाम जातरा तैं कुमौ जन्नि ज्वड़णा कोसिस करणा छन। अब जब धामी न प्रधानमंत्री तैं माँ गंगा कु मैत औंणा कु न्यूतौ द्यायी, जख अबि तक देस कु क्वीं बि प्रधानमंत्री नीं ऐ छायीं। मुख्यमंत्री धामिन उ लोगु तैं यु जवाब च, जु क्षेत्रवादै आग तैं पिळचै की अपणि राजनैतिक र्वटि पकौंणा मौका ख्वजणा छायीं।

अब मोदिन ह्यूंदा मैनौं चारधाम जातरा वास्ता सरकार तैं सलाह देकैकि एक नै उमेद जगै दे। अब मोदी की सलाह बाद धामी सरकारै ‘बारामासी’ पर्यटन पर फौंकुड़ा लगण तय छन।