सबि पुळौं क जांच खूंणि कमेटी बण्यें ज्यां : यूकेडी

देरादूण। रायपुर तोक मा भोपाल पाणि मा धन्याडी पुळ थैं हुयां नुकसान थैं देय्खण खूंणि यूकेडी मौका फर पौंचि अर धरना द्यायीं। यूकेडी नराजगी दिख्यें अर बोलि कि सबि पुळु क जांच हूंणि चैंद।

बतै दियां कि धन्याड़ी कु पुळ साळ 2018 मा बणि छायीं। पुळ बणणा क साळ भर बाद हि पुळ थैं ज्वड़न वळि सड़क भ्वां बैठिग्यें छायीं, जै फर यूकेडी न पुळा क गुणवत्ता फर सरकार अर विभाग फर सवाल खड़ा कैकि पुळा थैं बणाैंणा मा भ्रष्टाचार कु आरोप लग्यें छायीं।

यांका बाद पुळ एक दा दुबरा धंसीग्यें, जै क बाद पुळ थैं गाड़ियों खूंणि बन्द कर्यें ग्यें छायीं, दुबरा रातिमा पुळ थैं ज्वड़न वळि सड़क पूरी टूटिग्यें।

यूकेडी क मीडिया प्रभारी शिवप्रसाद सेमवालन बोलि कि यु पुळ ना प्रदेस मा सर्या पुळ भ्रष्टाचार पुटगा मा चलिग्यीं। उन्न बोलि कि धन्याडी पुळ थैं ज्वड़न वळि सड़क कु टुटणु यु बतौंणु च कि विभाग, भाजपा क नेता जु ठेकदार बणिग्यें अर 2018 क मुख्यमंत्री त्रिवेन्द्र सिंह रावतन खुब घूस खें।

यूकेडी क उपाध्यक्ष सुनील ध्यानी न बोलि कि उत्तराखण्ड मा भाजपा सरकार गौळा तई भ्रष्टाचार मा डुबी च। उन्न बोलि पुळ बणौंण मा हुयीं लपरवै खूंणि ठेकदार अर विभागा जिम्मेबार असफर पर कारवै हूंण चैंद। उन्न बोलि कि यु पुळ हि ना बल्कि सबि पुळौं क जांच खूंणि कमेटी बण्यें जाण चैंद।

धरना देंण वळों पंकज पोखरियाल, अनमोल सक्सेना, अभिषेक, अनुज चौधरी, वीर सिंह रावत छायीं।